Саха сиригэр волонтердар уонна бэйэлэрин баҕаларынан кыттааччылар хамсааһыннарыгар 15 тыһыынча киһи кыттар.
Өрөспүүбүлүкэҕэ кэнники икки сылга волонтердар ахсааннара биэс төгүл элбээбитэ бэлиэтэнэр. Күн бүгүн сэттэлэриттэн үөһээ саастаах дьон, уопсайа 15 000 киһи босхо көмөлөһөллөр уонна кыһалҕалаахтары өйүүллэр, араас тэрээһиннэргэ кытталлар. Бу миэдик-волонтердар, Кыайыы волонтердара, үрүҥ көмүс волонтердар, култуура волонтердара уонна көмө аахсыйаларыгар кыттар волонтердар. Кинилэр ортолоругар — уопсастыбаннай лиидэрдэр, көхтөөх гражданскай позициялаах дьон, ыччаттар, предпринимателлэр бааллар.
—Биһиги өрөспүүбүлүкэбит дьоно үтүө санаалаахтар, аһыныгастар, көмөлөһөргө мэлдьи бэлэмнэр. Хардарыта көмөлөсүһүү, өйөбүл буолуу, кыһалҕалаахха көмөлөһүү өбүгэ саҕаттан илдьэ сылдьар үтүө үгэспитинэн буолар, — диир Ил Дархан Айсен Николаев.
Бүтүн Арассыыйатааҕы аахсыйаларга волонтердар уонна бэйэлэрин баҕаларынан көмөлөһөөччүлэр көхтөөхтүк кытталлар уонна социальнай бырайыактары олоххо киллэрэллэр. #Бары бииргэ волонтердара доруобуйаларынан хааччахтаах гражданнарга, 60-рын ааспыт аҕам саастаахтарга, мэдиссиинэ тэрилтэлэригэр пандемия саҕаланыаҕыттан көмөлөһөллөр. Ааспыт сыл түмүгүнэн миэдик-волонтердар Саха сиринээҕи салаалара 400 тыһ. 1 мөл.диэри нэһилиэнньэлээх эрэгийиэннэр ортолоругар Арассыыйатааҕы куонкуруска бастыҥынан ааттаммыта.
Быйыл кулун тутарга «Поможем маме» бырайыак саҕаламмыта. Бырайыак эрэгийиэҥҥэ биллэриллибит Ийэ сылын иитиэн ыытыллар. Волонтердар өрөспүүбүлүкэ бары улуустарыгар ийэлэргэ көмөлөһөллөр. Маны таһынан, өрөспүүбүлүкэ киин куоратыгар Донецкай уонна Луганскай норуодунай өрөспүүбүлүкэлэртэн кэлэр дьоҥҥо гуманитарнай көмөнү оҥорор пуун үлэлиир.
+1
+1
+1
+1
+1
+1
+1