Саха сиригэр коронавируснай инфекцияны утары быһыыны 44 мэдиссиинэ тэрилтэтигэр, 156 вакцинация пуунугар биэрэллэр. 110 мобильнай биригээдэ тэриллэн үлэлиир.
Бу пууннар сууккаҕа 10 тыһыынча киһиэхэ быһыыны биэрэр кыахтаахтар. Барыта 570 мэдиссиинэ үлэһитэ хабыллан үлэлиир. Быһыыны харайарга анаан мэдиссиинэ тэрилтэлэригэр 311 тоҥорор тэрили бэлэмнээбиттэр.
Кулун тутар 13 күнүнээҕи туругунан, өрөспүүбүлүкэҕэ барыта 56 412 устуука быһыы кэллэ. Ол иһигэр: “ГамКовидВак” — 55 212 устуука, “ЭпиВакКорона” — 1200 устуука.
Бу күҥҥэ диэри быһыы бастакы укуолун 55 093 киһи, иккис укуолун 31 797 киһи ылла диэн доруобуйа харыстабылын министиэристибэтэ иһитиннэрэр.
Өрөспүүбүлүкэтээҕи суһал ыстаап иһитиннэрэринэн, Саха сиригэр кэлбит вакцина 98,5%-на туһанылынна. Күн аайы 40-ча киһи саҥа коронавируснай инфекциянан ыалдьа турар, билигин да ыарыы сүттэ, күөдьүйүө суоҕа диэн этэр кыаллыбат. Пандемия саҕаланыаҕыттан 984 585 анаалыс оҥоһуллубут.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru