Өрөспүүбүлүкэҕэ — Төрөөбүт Ийэ тыл уонна сурук-бичик күнэ

Бөлөххө киир:

Олунньу 13 күнүгэр, Бырабыыталыстыба 2-с №-дээх дьиэтигэр Төрөөбүт Ийэ тыл уонна сурук-бичик күнүнэн, саха тылын үйэтитиигэ, сайыннарыыга үлэлэспит дьону наҕараадалаатылар.

edersaas.ru

СӨ Бырабыыталыстыбатын Бэрэссэдээтэлин солбуйааччы Сергей Местников:

—Төрөөбүт төрүт тыл уонна сурук-бичик биһиги норуоппут уратыта, күүһэ, баайа-дуола буолар. Биллэн турар, омук инники сайдар кэскилэ тылтан тутулуктаах. Биһиги өрөспүүбүлүкэбитигэр 120-ттэн тахса омук эйэ-дэмнээхтик олорор. Онно хас биирдии тыл уратытыгар, култууратыгар, итэҕэлигэр сыаннаһа сытар. Биһиги бэйэбит сахалыы ыраастык, ылбаҕайдык  саҥарбатахпытына, ким да саҥарыа суоҕа. Онон төрөөбүт төрүт тылбыт инникитэ хас биирдии киһиттэн тутулуктааҕын өйдүөхтээхпит. Бу сүдү сордугу үөрэх эйгэлэригэр, тэрилтэлэргэ эрэ сыбаамаҥ, – диэн бэрэссэдээтэли солбуйааччы эттэ.

Төрөөбүт төрүт тылы сайыннарыыга, саха тылын, литературатын, култууратын, үөрэтиигэ өр сыллаах айымньылаах үлэтин иһин Семен Андреевич Новгородов аатынан СӨ Ил Дарханын бириэмийэтинэн Дьокуускай куорат 26 №-дээх оскуолатын саха тылын уонна литературатын учуутала Марианна Николаевна Борисова наҕараадаланна.

Маннык бириэмийэни «Айар» национальнай кинигэ кыһатын дириэктэрин солбуйааччы Валерий Николаевич Луковцев тутта.

Дьүкээгир тылын уонна култууратын сайыннарыыга үгүс сыллаах таһаарыылаах үлэтин иһин, Николай Иванович Спиридонов-Тэки Одулок аатынан бириэмийэ хаһаайынынан Аллараа Халыма улууһун учуутала Федосия Николаевна Татаева буолла.

Эбээн тылын уонна култууратын сайыннарыыга үгүс сыллаах таһаарыылаах үлэтин иһин Василий Дмитриевич Лебедев аатынан СӨ Ил Дарханын бириэмийэтинэн  «Долгунча” фольклор бөлөҕүн салайар Зинаида Платоновна Никулина наҕараадаланна.

Эбэҥки тылын уонна култууратын сайыннарыыга үгүс сыаллаах таһаарыылаах үлэтин иһин Глафира Макарьевна Василевич аатынан СӨ Ил дарханын бириэмийэтин педагогическай үлэ бэтэрээнигэр Тамара Васильевна Хастаева5а  туттардылар.

СӨ Үөрэх уонна наука миниистирэ Михаил Сивцев саалаҕа баар дьону Төрөөбүт тыл уонна сурук-бичик күнүнэн эҕэрдэлээтэ:

—Саха тылын, суругун-бичигин төрүттээччи Семен Андреевич Новгородов  төрөөбүт күнүнүэн эҕэрдэ. Саха тылын сайыннарыыга, үйэтитиигэ оскуолаларга анал дьаһаллары киллэрэбит, тэрийэбит. Араас дьаһаллары, уураахтары Саха тылын сайдыытын концепциятыгар киллэрбиппит, — диэтэ.

«Бичик» кинигэ кыһата бу сылтан «Айар» диэн саҥалыы ааттанан, саҥа хайысхаларынан үлэтин саҕалаата. Салайааччы Август Егоров маннык эттэ:

—Мин санаабар, тылы  билбэт, мөлтөхтүк билэр, үчүгэйдик саҥарар-билэр диэн арахсарбыт кыра ахсааннаах норуокка омсолоох көстүү. Биһиги айар кыһабытынан талааннаах дьон кинигэлэрин бэчээттээн, тарҕатан үлэлиибит. Хомойуох иһин, кэнники сыллары кэтээн көрдөххө, сахалыы тыллаах кинигэ тахсара аҕыйаан иһэр. Ол аата төрөөбүт төрүт тылынан ааҕар киһи аҕыйаан эрэрин көрдөрөр буолуон сөп. Ол да буоллар, Арассыыйа бары эрэгийиэннэриттэн саамай ааҕар эрэгийиэн аатын ылбыппыт элбэҕи эрэннэрэр. Инникитин да күүспүтүн, өйбүтүн-санаабытын ууран туран, саха тылын сайыннарыыга үлэлиэххэ, айыахха-тутуохха.

Виктория Бястинова.

+1
0
+1
0
+1
0
+1
0
+1
0
+1
0
+1
0