Өрөспүүбүлүкэҕэ соҕотох хомус оҥорор дьахтар дьиэ кэргэнэ — “Бастыҥ дьиэ кэргэн”

Өрөспүүбүлүкэтээҕи “Бастыҥ дьиэ кэргэн” куонкурус “Куорат ыала” номинациятын кыайыылаахтара Софья Иннокентьевна, Иннокентий Иннокентьевич Акимовтар уонна Светлана Михайловна, Сергей Михайлович Граур дьиэ кэргэттэрэ бу күннэргэ Дьокуускай куоракка кэллилэр. Кинилэри кытта СӨ Үөрэҕин уонна наукатын миниистирин солбуйааччы Елена Семенова көрүстэ.

Кылгастык билиһиннэрдэххэ, Акимовтар дьиэ кэргэн Бүлүү улууһун олохтоохторо. Оскуола саастаах үс оҕолоохтор. Идэлэринэн учууталлар эрээри, Бүлүүгэ көһөн тиийиэхтэриттэн дьоҕус бизнеһинэн дьарыгыраллар. Ол курдук, аҕалара Иннокентий Иннокентьевич — тимир ууһа. Ийэлэрэ Софья Иннокентьевна харыс да хаалсыбакка, хомус оҥорор. Бука, өрөспүүбүлүкэҕэ эрэ буолбакка, бүтүн Россияҕа да соҕотох хомус оҥорор дьахтар буолуохтаах. Кыра маҕаһыыннаах буолан, оҥоһуктарын тута онно атыыга таһаараллар. Сакаас эмиэ ылаллар.
Икки сыллааҕыта Бүлүү улууһун маастардарын уопсастыбаннай түмсүүтүн тэрийбиттэр. Аҕалара бу түмсүү иһинэн уолун бииргэ үөрэнэр доҕотторун мунньан уус кистэлэҥнэригэр уһуйар. Уһаныан баҕалаах элбэх эрээри, мастарыскыайым кырата бэрт диэн кэпсиир. Инникитин кэҥэттэн, илиинэн уһаныы туризмын арыйар былааннаахтар. Маныаха анаан түүлэһэн сир ылбыттар. Быйыл сайын онно балаҕан туттубуттар. Утары үбүлээһин быһыытынан көмө көрүллүбүт эрээри, сыл бүттэ, онон эһиил халлаан сылыйа түстэ даҕаны ылсыбытынан барыахпыт дэһэллэр. Мирнэйтэн кэлбит эмиэ кыайыылаах дьиэ кэргэн аҕаларыгар туһаайан: “Сергей, уолгун илдьэ сайын биһиэхэ кэлээр. Бэйэҥ тутан-хабан сахалыы быһах оҥостон илдьэ барыаҥ”, — диэн Иннокентий саха киһитин сиэринэн үөрэ-көтө ыалдьыттата ыҥырар.
Иккис дьиэ кэргэн Светлана Михайловна, Иннокентий Иннокентьевич Граурдар эмиэ үс оҕолоох ыал. Миринэй куорат олохтоохторо. Аҕалара Миринэйдээҕи хайаны байытар кэмбинээккэ автобазаҕа суоппардыыр. Ыал ийэтэ контролердуур. Сүрүн үлэтин таһынан бурдук ас оҥорон атыылыыр. “Миринэйгэ үөрэнэргэ усулуобуйа барыта баар. Биһиги оҕолорбут 8-с №-дээх оскуолаҕа үөрэнэллэр. Улахан кыыспыт өссө оскуолаҕа үөрэнэ сылдьан суоппар, баттах кырыйааччы, 1С ЭВМ оператора куурустарын бүтэрбитэ. Билигин эбии үөрэхтээһин хайысхата өссө кэҥээн эрэр”, — диэн Светлана санаатын үллэстэр.

Бу кылгас көрсүһүүгэ оҕону үөрэтии, эбии дьарык, үлэҕэ уһуйуу, бэйэ дьыалатын арыныы уо.д.а. тиэмэлэргэ кэпсэттилэр. Миниистири солбуйааччы Елена Семенова: “Үөрэх министиэристибэтэ буоларбыт быһыытынан, биһигини оҕо-аймах, быһаччы сибээспит суох да буоллар, дьиэ кэргэн политиката интэриэһиргэтэр. Саамай сүрүнэ — оҕо. Араас куонкурустарга кыттан иһэргититтэн, миэстэлэһэргититтэн үөрэбит. Оҕону үлэнэн үөрэтэр хаһан да хаалыа суоҕа, олоҕор хайаан да туһаныаҕа”, — диэн эттэ.
Түмүккэ кыайыылаах дьиэ кэргэттэри кэлэн иһэр Саҥа дьылынан эҕэрдэлээн туран, министиэристибэ бэлиэтин – чуорааны бэлэхтээтэ. Ону сэргэ дьэрэкээн ойуулаах оҕолорго аналлаах энциклопедияны уонна “Бэс чагда” лааҕырга сынньаналларыгар путевка туттарда.

Людмила ПОПОВА.