Архитектура, тутуу, олорор дьиэ хайысхаларыгар сыһыаннаах «Хотугу сиргэ тутуу индустрията» эригийиэннэр икки ардыларынааҕы быыстапкаҕа Арассыыйа 14 уобалаһыттан уонна кыраайыттан 60-тан тахса кыттааччы кэлэн кытынна.
edersaas.ru
Быыстапкаҕа киирэн иһэн, тута аантан хочуолунай тупсаҕай макета турарын көрөөт, онно чуо хааман тиийдим.
Көрдөххө — оҥоһуута боростуойа сүрдээх. Киһи эрэ тутан, таҥан барыах курдук. Ол иһин анаан иҥэн-тоҥон ыйыталастым.
Максим Звягинцев — Барнауллааҕы хочуолунайдар бырайыактарын оҥорон биэрэр эрэ буолбакка, миэстэтигэр кэлэн хочуоллары олордон, таҥан, тэриллэрин барытын туруоран биэрэр собуот бэрэстэбиитэлэ.
— Хампаанньабыт тэриллибитэ 15-с үбүлүөйдээх сылын бэлиэтээбиппит. Биһиги Саха сирин кытта үлэлээбиппит ахсыс сыла. Эмиэ маннык быыстапкаҕа сылдьан, улуустар баһылыктарын, ОДьКХ салайааччыларын кытта билсибиппит. Бүгүҥҥү күҥҥэ биһиги Таатта улууһугар Ытык-Күөлгэ, Уус-Тааттаҕа, Уус Алдан улууһугар Мындааба нэһилиэгэр, Усуйаана Депутатскайыгар, Мииринэйгэ, Халымаҕа модульнай хочуолунайдары, хочуоллары таҥан туруордубут. Маннык быыстапкалар олус туһалаахтар. Бастакы билсиһии, кэпсэтии бу мантан саҕыллар. Ол иһин биһиги бу быыстапканы биирдэ да көтүппэккэ, сыл аайы кэлэбит«, — диэн санаатын үллэстэр Барнауллааҕы хочуолунайдары таҥар собуот менеджерэ.
Саха сирин улуустары кытта үгүстүк алтыспыт буолан, Максим Звягинцев тыа сирин нэһилиэктэрин ааттарын биири да сыыспакка ааттаталыыра сөхтөрдө. Онон олус суолталаах быыстапка өрөспүүбүлүкэбит сайдыытыгар дьоһуннаах кылаатын киллэрэр.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа уонна видеоҕа ааптар түһэриитэ уонна устуута