Саха сиригэр коронавируснай инфекцияны утары быһыыны 44 мэдиссиинэ тэрилтэтигэр, 156 вакцинация пуунугар биэрэллэр. 110 мобильнай биригээдэ тэриллэн үлэлиир.
Бу пууннар сууккаҕа 10 тыһыынча киһиэхэ быһыыны биэрэр кыахтаахтар. Барыта 570 мэдиссиинэ үлэһитэ хабыллан үлэлиир. Быһыыны харайарга анаан мэдиссиинэ тэрилтэлэригэр 311 тоҥорор тэрили бэлэмнээбиттэр.
Кулун тутар 9 күнүнээҕи туругунан, өрөспүүбүлүкэҕэ эбии 56 412 устуука быһыы кэллэ. Ол иһигэр: “ГамКовидВак” — 55 212 устуука, “ЭпиВакКорона” — 1200 устуука.
2021 сыл кулун тутар 9 күнүгэр быһыы бастакы укуолун 53 467 киһи, иккис укуолун 25 451 киһи ылла диэн доруобуйа харыстабылын министиэристибэтэ иһитиннэрэр.
Өрөспүүбүлүкэ нэһилиэнньэтин 60%-нын коронавируснай инфекцияны утары быһыынан хабар сорук турар. Ол ирдэбили толорорго өссө 321 400 устуука быһыы кэлиэхтээх.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru