Өрөспүүбүлүкэҕэ история уонна култуура нэһилиэстибэтэ — 35 пааматынньык өрөмүөннэннэ.
Хаҥалас улууһугар Күөрдэмҥэ ХIХ үйэтээҕи Николаевскай таҥара дьиэтэ (мас) чөлүгэр түһэриллэн бүттэ. Үлэлэр Саха АССР 100 сылынан «Култуураны уонна туризмы сайыннарыы» федеральнай бырагыраама иитинэн итиэннэ СӨ Ил Дархана Айсен Николаев 2019 сыллаахха көҕүлээбит «Пааматынньыктары харыстыаҕыҥ» бырайыагынан ыытылыннылар.
«Өскөтүн биһиги култуурунай нэһилиэстибэбитин харыстыырга кыһаллыбатахпытына, бэрт сотору кэминэн элбэҕи сүтэриэхпит. Бырайыак уһулуччулаах биир дойдулаахтарбытыгар сүгүрүйүүбүтүнэн, историяҕа киирбит уонна култуурунай баайбытын-дуолбутун үйэтитэрбитигэр кылааппытынан буолар«, — диир Ил Дархан Айсен Николаев.
Кини кэргэнин кытта тус бэйэлэрин үптэринэн Тааттаҕа Чөркөөххө үктүүр миэлиҥсэни (XIX үйэ) сөргүтэргэ көмөлөспүттэрэ. Ил Дархан көҕүлээһинин Саха сирин элбэх олохтооҕо өйөөбүтэ. Кинилэр ортолоругар норуот дьокутааттара, министиэристибэлэр, биэдэмистибэлэр салайааччылара, олохтоох салайыныы, бөдөҥ тэрилтэлэр, дьоҕус биисинэс бэрэстэбиитэллэрэ бааллар. Кинилэр бары 35 култуура эбийиэгин чөлүгэр түһэриигэ үбүнэн-харчынан көмөлөстүлэр.
2020 сыллаахха Тааттаҕа федеральнай уонна эрэгийиэн суолталаах өйдөбүнньүктэр — Пекарскай балаҕана (XIX үйэ) уонна 1867 сыллааҕы аҕыс кырыылаах бабаарына (мас) өрөмүөннэммиттэрэ. 2021 сылга федеральнай суолталаах Манчаары башнята (XIX) чөлүгэр түһэрилиннэ. Эбийиэги Мэҥэ Хаҥаластааҕы кыраайы үөрэтэр түмэл быыстапкаҕа көрдөрөр уонна дьон-сэргэ тиһиктээхтик сылдьарыгар анаан аһылынна.
Горнай, Нам, Нерюнгри, Ньурба, Орто Халыма, Хаҥалас, Чурапчы уо.д.а. улуустарга историяны кэрэһилиир, гражданскай сэриигэ уонна Аҕа дойду уоттаах сэриитигэр анаммыт пааматынньыктар сөргүтүлүннүлэр. Олортон биирдэстэринэн Нерюнгригэ Аҕа дойду уоттаах сэриитигэр Улуу Кыайыы 50 сылыгар анаммыт мемориал буолар.
«Бырайыак иитинэн Дьокуускайга Суорун Омоллоон дьиэтин реставрациялааһын былааннанар. Ытык Таҥаһыгар тутуу комплекса, ону сэргэ, Таатта улууһугар Чөркөөххө музейга хас да эбийиэк бааллар. Салгыы Мэҥэ Хаҥалас оройуонугар Атыыр Тириитэ диэн сиргэ Сэбиэскэй Сойуус ДЬоруойа Федор Попов дьиэтин чөлүгэр түһэрэргэ инвестордары көрдүүбүт. Маны сэргэ, Намҥа Былатыан Ойуунускай дакылааттаабыт тырыбыната былааҥҥа баар«, — диир СӨ Култуура уонна устуоруйа эбийиэктэрин харыстыыр департамены салайар Николай Макаров.
Санатан эттэххэ, «Пааматынньыктары харыстыаҕыҥ» бырайыак сүрүн сыала эрэгийиэн култуурунай нэһилиэстибэтин харыстыырга, төрөөбүт кыраайбыт историятын билиини киэҥник тарҕатарга, ыччат төрөөбүт дойдутун таптыырыгар, бэриниилээх буоларыгар иитиигэ туһаайыллар. Бырайыактар түмүктэрэ 2022 сыл муус устар 18 күнүгэр, пааматынньыктары уонна историческай миэстэлэри харыстааһын норуоттар икки ардыларынааҕы күннэригэр тахсар.
+1
+1
+1
+1
+1
+1
+1