Кулун тутар 24 күнүгэр, үрдүк бэлэмнээх буолуу эрэсиимэ киллэриллибитин кэнниттэн тэриллибит үһүс мунньахха Айсен Николаев кыраныысса таһыттан кэлбит дьону чинчийэргэ анаан 35 обсерватор тэриллибитин туһунан эттэ.
edersaas.ru
Улуустар уонна куораттааҕы уокуруктар баһылыктарын кытары видеоконференц сибээс ньыматынан ыытыллыбыт бу сүбэ мунньахха Ил Дархан миэстэҕэ быһыыны-майгыны билсэ турарга эттэ, кэккэ дьаһаллары биэрдэ. Кыраныысса таһыттан кэлбит гражданнар бэйэни изоляцияланыы эрэсиимигэр киирэллэригэр эппиэтинэс баһылыктарга сүктэриллэрин санатта. Кэнники икки нэдиэлэ устата Саха сиригэр атын дойдулартан икки тыһыынча киһи кэлбит, ол иһигэр биир тыһыынчата улуустар олохтоохторо. Ол эрээри, бу дьонтон аҥаардара эрэ хонтуруолга ылыллыбыт, атыттар ханна бааллара биллэ илик.
– Быһыы-майгы судургута суоҕун өйдүүргүтүгэр көрдөһөбүн. Кыраныысса таһыттан кэлбит дьон 14 хонукка бэйэни изоляцияланыы эрэсиимигэр олорорун хааччыйыы баһылыктар сирэй эппиэтинэскит буолар. Үлэни күүһүрдүҥ, – диэтэ Ил Дархан.
Айсен Николаев үлэ биэрээччилэргэ дьону ыраахтан (дьиэлэригэр) үлэлэтэргэ сүбэлээтэ. Күн бүгүн 87 400 киһиттэн итинник көрүҥүнэн үлэлииргэ 13 818 киһи көспүтүн эттэ.
– Дьон социальнай ситимнэринэн ыраахтан үлэҕэ көһүөхтэрин баҕаралларын салалта утарарын туһунан суруйаллар. Дьиҥинэн үгүс киһи, ол иһигэр юристар, бухгалтердар, улуус үлэтигэр-хамнаһыгар туох да хоромньуну оҥорбокко, ыраахтан олорон үлэлиэхтэрин сөп, – диэтэ.
Айсен Николаев ураты болҕомтону сааһырбыт дьону хааччыйыыга, бу үлэҕэ социальнай сулууспалары тардарга эттэ. 60-уттан аҕа саастаах дьон кутталлаах кирбиигэ сылдьаллар — кинилэр коронавирус дьаҥар түргэнник хаптараллар уонна уһуннук эмтэнэн үтүөрэллэр. Улуустарга уонна куораттааҕы уокуруктарга 35 обсерватор тэриллибит. Онно 2 790 миэстэлээх 62 эбийиэк үлэлиэҕэ. Билигин обсеватордар материальнай-техническэй өттүнэн хааччыйыллаллар, медицинскэй персонал анал үөрэтиини бара сылдьар.
Сүбэ мунньахха вице-премьер Ольга Балабкина баһылыктар сааскы уһун өрөбүл кэнниттэн оскуола үөрэнээччилэрин ыраахтан үөрэтиигэ көһөрөргө бэлэмнэнии үлэтин күүһүрдэллэригэр эттэ диэн Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова, «Саха сирэ» edersaas.ru
Марии Васильева, ЯСИА хаарыскаҕа түһэриитэ.