Ольга Балабкина оҕо күүтэр хат дьахталлар уонна кырачааннарын эмтэрэр ийэлэр дьиэ кэргэттэрэ вакцинацияны ылалларыгар сүбэлээтэ.
Бэҕэһээ Дьокуускайга өрөспүүбүлүкэтээҕи килиниичэскэй балыыһаҕа Бүлүү улууһуттан коронавирустаабыт хат дьахтар киирбитин иһитиннэрдэ.
«Оҕо күүтэр уонна кырачааннарын аһатар дьахталлар кутталлаах бөлөххө киирэллэр, тоҕо диэтэххэ кинилэр вакцина ылбаттар. Ол иһин, биһиги кинилэргэ куттал суоһаабатын туһугар, аттыларыгар баар, тулалыыр дьоннорун, дьиэ кэргэттэрин быһыыны ылалларыгар сүбэлиибит», — диэтэ Ольга Валерьевна.
Вице-премьер доруобуйа харыстабылын тэрилтэлэрэ диспансер учуотугар турар гражданнарга, ону таһынан хат дьахталлар уонна оҕолорун аһатар ийэлэр дьиэ кэргэттэригэр бэрэбиэркэ, мониторинг оҥороллорун эттэ. Ман сэргэ, бэс ыйыгар, үгэс курдук, өрөспүүбүлүкэ таһыгар тахсыы, оройуоннар икки ардыларыгар кэлии-барыы элбиирин, улуустарга Дьокуускайтан сайыҥҥы сынньалаҥнарыгар устудьуоннар, оҕолор тиийэллэрин санатта. Ольга Балабкина куораттан эбэтэр атын улуустартан тиийэр аймахтардаах дьиэ кэргэттэри коронавирус кутталлаах дьаҥыттан харыстаналларыгар, быһыыны ылалларыгар сүбэлээтэ.
Өрөспүүбүлүкэҕэ билиҥҥи туругунан 202 409 дуоза вакцина кэлбит. 175 тыһыынча киһи бастакы быһыытын ылбыт, ол иһигэр 60 саастарын ааспыт 40 тыһыынчаҕа чугаһыыр киһи. Өрөспүүбүлүкэҕэ аҕалыллыбыт вакцинаттан 86,6% туһаныллыбыт.
Мария Васильева (СИА) хаартыскаҕа түһэриитэ.