Доруобуйа

Өрөспүүбүлүкэҕэ 152 киһи ыарахан туруктаах балыыһаҕа сытар

Өрөспүүбүлүкэҕэ дьаҥ тарҕаныытын бохсор суһал ыстаап уочараттаах брифинигэр балаһыанньа бэрдэ суоҕун иһитиннэрдилэр.

edersaas.ru

Ааспыт сууккаҕа 231 киһи коронавируһунан ыалдьыбыта биллибит. Итинтэн баһыйар улахан аҥаара – 126 киһи Дьокуускайга. Мэҥэ Хаҥалас уонна Нам улуустарыгар балаһыанньа ордук сытыырхайбытын, нэһилиэнньэ быһыыны ылыыта намыһаҕын, онон ыалдьыбыт уонна ыарахан туруктаах дьон улахан аҥаардара быһыыны ылбатахтарын иһитиннэрдилэр.

Таатта улууһугар балаһыанньа билигин даҕаны тупса илик, бэҕэһээ өссө 8 киһи ыалдьыбыта биллибит.

Кэккэ улуустар, бастатан туран, хотулар уонна Бүлүү оройуон таһыттан кэлэр дьоҥҥо тотальнай тестирование ыытарга быһаарыы ылыммыттар.

Билиҥҥитэ 152 киһи ыарахан туруктаах, 34 киһи ИВЛ аппараакка холбонон сытар. Күн бүгүн быһыыны ылбатах 60-тан үөһэ саастаах дьоҥҥо ыарыы ордук кутталлааҕын санаталлар.

Арассыыйаҕа коронавирустаабыт дьонтон 98 бырыһыана быһыыны ылбатахтар эбит. Онтон өрөспүүбүлүкэҕэ ити сыыппара 98,5 бырыһыаҥҥа тэҥнэһэр.

Аны Саха сиригэр бу куһаҕан дьаҥтан олохтон туораабыт дьон 86 бырыһыана 65-тэн үөһэ саастаах дьон эбит. Онон бырабыыталыстыба бэрэссэдээтэлин солбуйааччы Ольга Балабкина: “Саастаах дьоҥҥо бэйэлэригэр, кинилэр оҕолоругар туһаайан этэбин – аҕа саастаах көлүөнэбитин, дьиэ кэргэни харыстыыр инниттэн дьаҥтан утары быһыыны ылалларыгар ыҥырабын”, — диэн эттэ. 65-тэн үөһэ саастаах дьон 47 бырыһыана эрэ быһыыны ылбыт эбит. Балыыһаҕа сытар ыарыһахтар улахан аҥаардара 60-тан үөһэ саастаах дьон, үгүстэрэ быһыыны кэмигэр ылбатахтар.

Саха сиригэр бастакы быһыыны 355 241, ревакцинацияны 13 050 киһи ааспыт.

Онтон оҕолор туһунан эттэххэ, ыалдьыбыт дьон 20 бырыһыана оҕо аймах эбит.

Бүгүҥҥү брифиҥҥэ этиллибит инчэҕэй эттээҕи эрэ дьиксиннэрэр сыыппаралар туох эрэ түмүк оҥосторго сирдиэхтэрэ диэн эрэнэбит.

 

Людмила ПОПОВА, “Саха сирэ” хаһыат, edersaas.ru

Хаартыска: https://stormoff.ru/mediacenter/articles/article_249/

0
0