Айсен Николаев бүгүн сарсыарда 11 чааска коронавируһу утары ыытыллар үлэ туһунан иһитиннэриитигэр, өрөспүүбүлүкэ медиктэрэ сууккаҕа 4000 анаалыһы оҥорор таһымҥа тиийбиттэрин, ити дойдуга үрдүк көрдөрүү буоларын бэлиэтээтэ.
edersaas.ru
— Бүгүҥҥү туругунан ыалдьыбыт киһи ахсаана 960 буолла, итинтэн 367 киһи үтүөрдэ. Уон киһи (икки киһи Миирнэйгэ, аҕыс киһи Дьокускайга) ыарахан туруктаах, 704 киһи обсерваторга эмтэнэр. Кэлиҥҥи сууккаҕа 46 киһи ыарыйда. Мантан 43 киһи Дьокуускай олохтоохторо буолаллар. Ыарыы тарҕаныытын сүрүн биричиинэтинэн дьиэ кэргэн уонна тэрилтэ иһинээҕи алтыһыы буолар. Санитарнай-эпидемиологическай ирдэбиллэри кэһииттэн сылтаан, Халтурин аатынан уулуссаҕа баар обсерваторга ыарыы көрдүгэннээһинэ тахсан, салалта уларытылынна, эмтиир уонна сэрэтэр-хааччахтыыр дьаһаллар күүһүрдүлүннүлэр. Көрдүгэннээһин салгыы тарҕамматыгар эрэнэбит. Онон ханна даҕаны эппиэтинэһи күүһүрдэргэ, санитарнай-эпидемиологическай ирдэбиллэри кытаанахтык тутуһарга, дезинфекциялыыр үлэттэн саҕалаан, бары мааскалаах, бэрчээккилээх сылдьарга өссө төгүл этэбит.
Бу ордук Дьокуускай куорат олохтоохторугар сыһыаннаах. Коронавирус дьаҥар ордук элбэх киһи хаптарбытынан сибээстээн, кылаабынай санитарнай быраас уонна куорат дьаһалтатын этии киллэриилэринэн, сорох хайысхаларынан хааччахтыыр дьаһаллар күүһүрдүллүөхтэрэ. Ол туһунан бүгүн суһал штаб мунньаҕар кэпсэтиэхпит.
Арассыыйа Бырабыыталыстыбатын дьаһалынан, дьиэҕэ олоруу эрэсиимин тутуһар 65-тэн үөһээ саастаах дьоҥҥо (дьиэҕэ олорон үлэҕэ көспөтөхтөргө) «электронай больничнайы» ыам ыйын 29 күнүгэр диэри уһатылынна.
Сунтаар улууһугар баар баахтабай бөһүөлэктэн харантыын эрэсиимэ уһулунна. Биһиги тестэри оҥорууга үрдүк таһымҥа таҕыстыбыт, медиктэртэр сууккаҕа 4000 анаалыһы оҥорон, ыарыы саҥа саҕаланан эрдэҕинэ быһаараллар, ити дойдуга үрдүк көрдөрүү буолар.
Раиса Сибирякова, «Саха сирэ» хаһыат, edersaas.ru