Өрөспүүбүлүкэ доруобуйа харыстабылыгар РФ боруобалыыр бырайыагар кыттар
Саха сиригэр бу нэдиэлэҕэ РФ Доруобуйаҕа харыстабылын министиэристибэтин оробуочай бөлөҕүн чилиэннэрэ үлэлээтилэр.
edersaas.ru
Кинилэр «Доруобуйа бастакы сүһүөх звенотун саҥа моделларын оҥоруу» диэн боруобалыыр (пилотнай) бырайыак чэрчитинэн үлэлээтилэр.
Боруобалыыр бырайыак мэдиссиинискэй үлэһиттэр тиийбэт усулуобуйаларыгар нэһилиэнньэҕэ көмө оҥорор бастакы сүһүөх звенону тэрийии ньымаларын уларытарга туһуланар. Бырайыакка Белгород, Омскай, Курган, Оренбург, Тамбов уобаластара, Саха Өрөспүүбүлүкэтэ уонна Севастополь кытталлар. Доруобуйа харыстабылын тэрийии уонна информатизация научнай-чинчийэр киин институтун доруобуйа харыстабылын тэрийии научнай төрүттэригэр отделын кылаабынай научнай үлэһитэ Михаил Котловскай быһаарбытынан, РФ субъектарын географическай уратылара уонна доруобуйа харыстабылын систиэмэтин салгыы сайыннарарга интэриэстээх эрэгийиэннэр учуоттаннылар.
Саха сиригэр пилотнай былаһааккаларынан 3 №-дээх куораттааҕы килиниичэскэй балыыһа уонна Мэҥэ Хаҥалас улууһун оройуоннааҕы балыыһата буоллулар. Москваттан кэлбит ыалдьыттар бу балыыһаларга үлэлээтилэр.
— Билигин бырайыак 2022 сыл от ыйыгар түмүктэниэхтээх бастакы түһүмэҕэ олоххо киллэриллэр. Биһиги сорукпут — KPI (мэдиссиинискэй тэрилтэлэр көдьүүстэрин көрдөрүүтэ) туһаныыны боруобалааһын. Ону быраастар, орто уонна алын сүһүөх мэдиссиинискэй үлэһиттэр үлэлэрин сыаналыырга туттар былааннаахпыт. Биһиги эмчиттэр үлэлэрин төлөбүрүн систиэмэтин уларытар критерийдэри боруобалыыбыт. Бу критерийдэр ыарыһахтары эмтээһин көдьүүһүн үрдэтэргэ көҕүлүөхтээхтэр, -– диэтэ М.Котловскай.
Бырайыак түмүк сыала-соруга -– нэһилиэнньэни мэдиссиинискэй хааччыйыы хаачыстыбатын үрдэтии. Ол эбэтэр эмтэнээччилэр быраастарга суруйтарбыттарын кэтэһэллэригэр аҕыйах бириэмэни аныахтара, диспансеризация хаачыстыбата тупсуоҕа уо.д.а.
— Бу сырыыбыт биһиэхэ үчүгэй санаалары үөскэттэ. Эрэгийиэн салалтата доруобуйа харыстабылын салаатын инникитин туһугар (бэл, пандемия уустук кэмигэр) олус элбэҕи оҥорор. СӨ бырабыыталыстыбатын бэрэссэдээтэлин солбуйааччы Ольга Балабкинаны, доруобуйа харыстабылын миниистирэ Лена Афанасьеваны кытары көдьүүстээх көрсүһүүлэр буоллулар, кинилэр биһиги этиилэрбитигэр улахан интэриэстээхтэрин уонна үөскээбит боппуруостары түргэнник быһааралларын көрдүбүт. 3 №-дээх куорат балыыһатыгар уонна Мэҥэ Хаҥалас оройуоннааҕы балыыһатыгар нэһилиэнньэҕэ мэдиссиинискэй көмөнү оҥоруу таһыма үрдүк эбит. Сүрүнэ, эһиги эмчиттэргит саҥа технологиялары олоххо киллэрэргэ көхтөөхтөрүн биллибит, бу боруобалыыр бырайыак хайаан да табыллыаҕар эрэли үөскэтэр, -– диэтэ Михаил Котловскай.
Надежда ЕГОРОВА, «Саха сирэ» хаһыат, edersaas.ru
СӨ Доруобуйа харыстабылын министиэристибэтин пресс-сулууспатын хаартыската