Былырыын үп сүрүн сокуонугар уларытыылар киирэннэр, сыл устата бүддьүөт дохуоттаах чааһа 54,4 млрд солкуобай эбиллибит. Барыта холбоон 320,7 млрд солкуобайга тэҥнэспит. Отчуоту бүгүн дьокутааттар Ил Түмэн уочараттаах пленарнай мунньахтарыгар бигэргэттилэр.
Былырыын бүддьүөт сокуонугар үстэ уларыйыы киирбит. Бүддьүөт дохуоттаах чааһа сыл устата 54,4 млрд солкуобайынан эбиллибит. Ороскуота 59,7 млрд солкуобайынан үрдээбит. Өрөспүүбүлүкэ бүддьүөтэ сылы 33,2 млрд солкуобай профициттаах түмүктээбит. Дохуоттаах чааһа сыл бүтэһигэр 320,7 млрд солкуобайга тэҥнэспит. Оттон ороскуота 296,9 млрд солкуобай буолбут. 2020 сылы кытары тэҥнээтэххэ, 15,7 бырыһыан үрдээн 38,9 млрд солкуобайга тэҥнэспит.
Үп миниистирэ Валерий Жондоров иһитиннэрбитинэн, алмаас, ньиэп, гаас эйгэтигэр үлэлиир хампаанньалар дохуоттарыттан эбии харчы киирбитинэн бүддьүөт дохуоттаах чааһа улааппыт.
Санатан эттэххэ, былырыыҥҥы сыллааҕы бүддьүөт туолуутун отчуотун Ил Түмэҥҥэ туһааннаах кэмитиэт мунньаҕар көрбүттэрэ. Мунньахха Счетнай палата хаарбах дьиэттэн дьону көһөрүү боппуруоһугар муниципальнай тэриллиилэр бүддьүөккэ үчүгэйдик үлэлээбэттэрин иһитиннэрбитэ. Ону сэргэ дьокутааттар тулаайах уонна төрөппүт көрүүтэ-истиитэ суох хаалбыт оҕолорго, элбэх оҕолоох ыалларга дьиэни-уоту биэриигэ муниципальнай тэриллиилэр үбүлээһин өттүгэр эмиэ сөптөөх үлэни ыыппаттарын бэлиэтээн эппиттэрэ.
Уопсай түмүккэ норуот дьокутааттара кэлиҥҥи сылларга бырабыыталыстыба бүддьүөт туолуутугар, ол иһигэр судаарыстыба иэһин кыччатыыга улахан үлэни ыытарын бэлиэтээтэ.
Аграфена КУЗЬМИНА