«Доруобуйа» национальнай бырайыак иитинэн ыытыллар доруобуйа харыстабылын бастакы сүһүөх звенотун саҥардыы бырагырааматынан, өрөспүүбүлүкэ мэдиссиинэҕэ тэрилтэлэригэр 25 көлө бэрилиннэ.
«УАЗ» көлөлөр сэлиэнньэлэргэ, бөһүөлэктэргэ, Саха сирин дьоҕус куораттарыгар — Абыйга, Алдаҥҥа, Аммаҕа, Анаабырга, Үөһээ Бүлүүгэ, Бүлүүгэ, Горнайга, Эдьигээҥҥэ, Мэҥэ Хаҥаласка, Ленскэйгэ, Намҥа, Ньурбаҕа, Өймөкөөҥҥө, Өлүөхүмэҕэ, Өлөөҥҥө, Орто Халымаҕа, Тааттаҕа, Томпоҕо, Уус Алдаҥҥа, Хаҥаласка уонна Чурапчыга суһал мэдиссиинэ көмөтүн анаан оҥорорго ылыллыбыттар. Бу туһунан СӨ Доруобуйа харыстабылын министиэристибэтин пресс-сулууспата суруйар.
Паллиативнай сулууспаҕа түөрт «Лада-грант» ылыллыбыт. 3 №-дээх өрөспүүбүлүкэтээҕи килиниичэскэй балыыһаҕа, Дьокуускай куорат мэдиссиинэҕэ киинигэр, Мииринэй уонна Нерюнгри киин балыыһаларыгар.
—Мэдиссиинэ тэрилтэлэрин материальнай-тэхиньиичэскэй баазаларын тупсарарга өрөспүүбүлүкэ салалтатын өртүттэн улахан үлэ ыытыллар. Саҥардан биэриигэ мэдиссиинэ тиэхиньикэлэрин таһынан, тырааныспарынан хааччыллыы боппуруоһа эмиэ быһаарыллар. Маныаха бу сирбит-уоппут уратытыгар, оройуоннар балыыһаларыттан элбэх нэһилиэнньэлээх пууннар ыраахтарынан бу олус наадалаах, — диэн этэр СӨ Доруобуйа харыстабылын миниистирэ Лена Афанасьева.
+1
+1
+1
+1
+1
+1
+1