Өрөспүүбүлүкэ бүддьүөтүн дохуоттаах чааһа 4,9 млрд солкуобайынан эбиллэн, 275,7 млрд солкуобайга тэҥнэһиэҕэ. СӨ бүддьүөтүн сокуонугар уларытыылары киллэриини бүгүн Ил Түмэн дьокутааттара пленарнай мунньахха өйөөтүлэр.
СӨ үбүн миниистирэ Валерий Жондоров дакылаатыгар иһитиннэрбитинэн, үп сүрүн сокуонугар уларытыылары киллэриигэ өрөспүүбүлүкэ социальнай-экономическай сайдыытын сүрүн көрдөрүүлэрэ, судаарыстыбаннай мэктиэлээһин, бүддьүөт кирэдьииттэрин биэрии уонна төннөрүү бырагыраамаларын чуолкайдааһын, бүддьүөт дефицитын төлөөһүнү көрүү учуоттаныллыбыт. Ону сэргэ өрөспүүбүлүкэ тирээн турар боппуруостарын быһаарыыга эбии үбүлээһин көрүлүннэ.
Онон үп сүрүн сокуонун көрдөрүүлэрэ уларыйаннар, өрөспүүбүлүкэ бүддьүөтүн быйылгы дохуоттаах чааһа 4,9 млрд солкуобайынан эбиллэн, 275,7 млрд солкуобайга тэҥнэһиэҕэ. 2023-2024 сылларга бу көрдөрүү 259,7 уонна 252,8 млрд солкуобайынан былааннанан турар.
Бүддьүөт ороскуоттаах чааһа быйыл 4,5 млрд солкуобайынан эбиллэн, 310,2 млрд солкуобай буолуоҕа. 2023 с. – 262,5, 2024 с. – 253,8 млрд солкуобай. Дефицитэ: 2022 с. – 34,5, 2023 с. – 2,7 млрд солкуобай, 2024 с. – 998,5 мөлүйүөн солкуобай.
Ил Дархан Айсен Николаев өрөспүүбүлүкэ экэниэмикэтин туруктаах буолуутун хааччыйыыга ыыппыт мунньаҕар: “Кулун тутардааҕы дааннайдарынан, ааспыт сылы кытары тэҥнээтэххэ, өрөспүүбүлүкэ экэниэмикэтэ үчүгэй көрдөрүүлээх иһэр. Эрэгийиэммит экэниэмикэтин туруктаах буолуутугар ылыммыт миэрэлэрбит көдьүүстээхтэрэ көһүннэ”, – диэн эрдэ ылыныллыбыт миэрэлэр көдьүүстээхтэрин бэлиэтээн турар. Ил Дархан этиитинэн экэниэмикэ туруктаах буолуутугар 15 млрд солкуобайдаах эбии миэрэлэр көрүллүбүттэрэ.
Аграфена КУЗЬМИНА