Ил Түмэн XXXV уочараттаах пленарнай мунньаҕар өрөспүүбүлүкэ быйылгы бүддьүөтүгэр уларытыылары киллэриини бигэргэттилэр. Бүддьүөт дохуоттаах чааһа эбилиннэ.
Үп миниистирэ Валерий Жондоров иһитиннэрбитинэн, бу уларытыылары киллэрии өрөспүүбүлүкэ хааһынатыгар судаарыстыбаннай уонна атын тэрилтэлэртэн тус сыаллаах үбүлээһин киириитин, бүддьүөккэ ааспыт сыл түмүгүнэн хаалбыт үбү көрүүнү, судаарыстыба иэс ылыытын, мэктиэлээһинин бырагыраамаларын чуолкайдааһыны, о.д.а. кытары сибээстээх.
Онон өрөспүүбүлүкэ быйылгы бүддьүөтүн дохуоттаах чааһа 6,2 млрд солкуобайынан эбиллэн, 270,8 млрд солкуобайга тэҥнэспит. Оттон ороскуота 38 млрд солкуобайынан эбиллэн, 305,7 млрд солкуобай буолбут. Дефицитэ – 34,9 млрд солкуобай. Үп сүрүн сокуонугар ыйылларынан, нолуоктан киирэр дохуот 5 млрд солкуобайынан кыччаабыт, ол оннугар өрөспүүбүлүкэҕэ киирэр атын үбүлээһин 11,2 млрд солкуобайынан үрдээбит. Холобур, “РусГидро” хампаанньаны кытары үлэлэһии түмүгэр бүддьүөккэ 11 млрд солкуобай киирбит, Коммунальнай хаһаайыстыбаны саҥардыы пуондатын нөҥүө 278,2 мөлүйүөн солкуобай кэлбит. Ону сэргэ Суол пуондатын үбүлээһинэ 816 мөлүйүөн солкуобайынан эбиллибит. Өрөспүүбүлүкэ хаһаас пуондата 4,5 млрд солкуобайга тэҥнэһэр.
Манна даҕатан эттэххэ, аан дойдуга буола турар быһыынан-майгынан РФ бырабыыталыстыбата нэһилиэнньэни, орто, дьоҕус бизнеһи өйүүргэ миэрэлэри ылыныахтаах, Ил Дархан Айсен Николаев дьаһалынан өрөспүүбүлүкэҕэ экэниэмикэ туруктаах буолуутугар анал оперативнай ыстаап тэриллэн турар. Ол иһигэр өрөспүүбүлүкэ үрдүнэн сыананы хонтуруоллааһын бара турар.
Аграфена КУЗЬМИНА