«Аан дойду уонна Арассыыйа экономиката арыый туттуна соҕус сайда турар кэмнэригэр, Саха сирэ сүрүн көрдөрүүтэ үчүгэй”, — диэн муус устар 11 күнүгэр СӨ Үпкэ-харчыга миниистирэ Валерий Жондоров биллэрдэ. Өрөспүүбүлүкэ бүддьүөтүгэр 2018 сылга уонна 2019-2020 сылларга былааннаан, уларытыы киллэрэр туһунан региональнай сокуон барылын дьүүллэһиигэ бүддьүөккэ киирэр дохуот кээмэйин туһунан кэпсэтии таҕыста.
edersaas.ru
Муус устар 1 күнүнээҕи туругунан, Саха сирин бүддьүөтүгэр 41 млрд. 474 мөлүйүөн суумалаах дохуот киирбит. Итиниэхэ 2018 сыл бастакы үс ыйын түмүгүнэн, ааспыт сылы кытта тэҥнээтэххэ, алмаас сырьетун атыыта тохсунньу ыйга үрдээн, күндү тааһы хостуур тэрилтэлэр барыыстарыттан тутуллар нолуок эбиллибитэ төрүөт буолбут. Бу туһунан миниистир Валерий Алексеевич иһитиннэрдэ.
Сахабыт сирин сүрүн экономикатын сир баайын хостуур бырамыысыланнай хампаанньалар тутан олороллор. Айылҕа баайын хостуурга уонна барыыстан тутуллар нолуок бүддьүөккэ киириитэ аан дойду сырьевой ырыынагар конъюнктурнай хамсааһынтан уонна солкуобайга туһааннаан, дуоллар куурсуттан улахан тутулуктаах.
Биллэрин курдук, аҕыйах эрэ хонуктааҕыта дуоллар 57-58 солк. турбута, онтон 64 солк. диэри үрдээтэ. Дуоллар кыра да халбаҥнааһына дойду экономикатыгар, бүддьүөт туолуутугар улаханнык охсор, ол иһин инникитин Эмиэрикэ күөх кумааҕытыттан тутулуга суох буолар туһугар «БРИКС» дойдулара (ол иһигэр Арассыыйа, Кытай о.д.а.) күүстэрин түмэн үлэлииллэр даҕаны, туох түмүк тахсарын бириэмэ эрэ көрдөрүө. Дуоллар былааһын сыппатыы саныырга билигин саарбах курдук эрээри, былаан төһөнөн амбициознай, оччонон толорорго интэриэһинэй.
Марианна Тыртыкова, «Саха сирэ», edersaas.ru