Өрөспүүбүлүкэ алта улууһа кыттыылаах аан бастакы хомус олимпиадата буолла
Хомуска олимпиада ыыталларын туһунан истибиккит дуо? Сэрэйдэххэ, суох. Дьэ баар эбит. Быйыл аан маҥнайгытын алын кылаас үөрэнээччилэригэр анаан тэрийдилэр.
Быйылгы олимпиаданы Сунтаар улууһун үөрэҕин управлениета, Г. Бессонов аатынан өрөспүүбүлүкэтээҕи устуоруйа-кыраайы үөрэтэр комплекс (Тойбохой), Н. Родионова аатынан Сунтаардааҕы оҕо айымньытын киинэ уонна аан дойдутааҕы хомус түмэлэ кыттыһан ыыттылар.
— Тойбохойдооҕу (Сунтаар) түмэл, Оҕо дьоҕурун сайыннарар киин, В.Г. Павлов аатынан алын оскуола көҕүлээһиннэринэн 2020 сыл сааһыгар Сунтаар улууһугар икки түһүмэхтээх олимпиаданы тэрийбиппит.
Хомус култууратыгар үһүс-төрдүс кылаас оҕолоругар аналлаах уопуппутун тарҕатаары өрөспүүбүлүкэҕэ таҕыстыбыт. Сунтаар, Ньурба, Үөһээ Бүлүү, Бүлүү уонна илин эҥэрдэртэн Мэҥэ Хаҥалас, Уус Алдан улуустарыттан барыта 140 оҕо кытынна.
Бу сырыыга үөрэх, култуура үлэһиттэрэ сүбэлэһэн баран, саха тимирин уһаарыы уонна саамай күндү тэрилбитин – хомуһу оҥоруу туһунан бастакы өйдөбүллэр, онно туттуллар сахатытыллыбыт тиэрминнэри киллэрэн үксүн тест быһыытынан ыыттыбыт. Барыта видеонан көстөр. Ол иһин теоретическай уруогу биэрдибит. Аныгы ыстандаарка олоҕуран, оскуола үлэлии олорор үөрэҕин бырагырааматыгар сөп түбэһиннэрэ сатаатыбыт.
Хомус култууратын сайдыыта үксүн бэстибээл халыыбынан барар – хомуһу тардыынан. Биһиги ити халыыптан туораан, саха хомуһун билиһиннэриигэ теория өттүгэр улахан хардыыны оҥордубут дии саныыбыт. Түмүк олус үчүгэй. Билигин ону анаалыстыыбыт, — диэн тэрийээччи, хомус педагога Антонина Никитина кэпсиир.
Олимпиаданы аныгы кэм сиэринэн тэйиччиттэн үс көрүҥүнэн ыыппыттар. Икки сыл дьаҥ кэмигэр оскуолалар, эбии үөрэхтээһин тэрилтэлэрэ аныгы технологияны хото баһылаабыттар, онон туох даҕаны уустуга суох бары холбонон кытыннылар диэн тэрийээччилэр бэлиэтииллэр.
Хомус олимпиадатын кыайыылаахтара
Теория чааһа:
I истиэпэннээх дипломаннар:
- Аринкина Айыллаана (Мэҥэ Хаҥалас улууһа),
- Третьяков Максим (Сунтаар улууһа),
- Обутов Спартак (Үөһээ Бүлүү улууһа),
- Прокопьев Данил (Сунтаар улууһа),
- Чуоппаан Алгыстаана (Сунтаар улууһа).
II истиэпэннээх дипломаннар:
- Александров Аман (Үөһээ Бүлүү улууһа),
- Андреева Виолетта (Сунтаар улууһа),
- Егоров Айал (Бүлүү улууһа),
- Алексеева Айыына (Сунтаар улууһа),
- Осипова Динара (Бүлүү улууһа).
III истиэпэннээх дипломаннар:
- Прокопьев Айвар (Бүлүү улууһа),
- Никитина Тускулаана (Мэҥэ Хаҥалас улууһа),
- Тобохова Саша (Үөһээ Бүлүү улууһа),
- Каратаева Иванна (Бүлүү улууһа),
- Муксунова София (Үөһээ Бүлүү улууһа).
Быраактыка чааһа:
Бурнашева Алгыстаана (Уус Алдан улууһа) — I истиэпэннээх лауреат,
Троева Сахалена (Уус Алдан улууһа) — II истиэпэннээх лауреат,
Саввина Лариса (Мэҥэ Хаҥалас улууһа) — III истиэпэннээх лауреат,
Громова Сайаана (Сунтаар улууһа) — I истиэпэннээх дипломант,
Прохоров Ваня (Мэҥэ Хаҥалас улууһа) — II истиэпэннээх дипломант,
Федорова Милана (Ньурба улууһа) — III истиэпэннээх дипломант.
Людмила ПОПОВА, “Саха сирэ” хаһыат, edersaas.ru
Хаартыска: Хомус түмэлиттэн.