Саха сирин олохтоохторо дойду Президенин быыбарыгар көхтөөхтүк кытталлар.
edersaas.ru
Саха Өрөспүүбүлүкэтин Киин быыбардыыр хамыыһыйатын бэрэссэдээтэлин солбуйааччы Иван Андросов иһитиннэрбитинэн, күнүс 15 чааска түмүллүбүт чахчынан, Саха сирин үрдүнэн 328 тыһ. 106 киһи, эбэтэр быыбардааччы 51,7 %-а бэйэтин гражданскай ытык иэһин толордо.
Туох барыта тэҥнэбилинэн сыаналаннаҕына, суолтата ордук күүһүрэр. Ол курдук, 2012 сыллаах быыбарга субу кэмҥэ быыбардааччы 49 %—а куоластаабыт эбит, итинэн быйыл быыбар быдан көхтөөхтүк баран иһэр диэн сыаналыыр сиэрдээх. Ордук үрдүк көрдөрүүлэри Анаабыр (79 %), Өлөөн (70 %), Амма (67 %), Горнай (64,5 %), Чурапчы (64,03 %) улуустара ситиспиттэр, саамай намыһах көрдөрүүнү Алдан улууһа (46,43 %) ылбыт, манна 14 тыһ. 922 киһи куоластаабыт. Элбэх куоластааччылаах улахан улууска дьиҥинэн бу куһаҕана суох көрдөрүү.
Суруналыыстар сарсыарда Депутатскайга, 617 №-дээх быыбардыыр учаастакка, таһаарыллыбыт кэһиигэ (болдьох иннинэ куоластаммыт 28 бүллүтүөннээх дьааһыгы арыйыыга) туох миэрэ ылыллыбытын туһунан ыйыттылар. Онуоха Иван Михайлович Киин быыбардыыр хамыыһыйа ити учаастакка сэрэтии биллэрбитин, быыбары сокуон ирдэбилин быһыытынан ыытарга, ол иһигэр болдьох иннинэ куоластаммыт бүллүтүөннээх дьааһыгы быыбар бүппүтүн кэннэ, куоластары ааҕар саҕана эрэ арыйарга, эппитин кэпсээтэ. Оттон болдьох иннинэ куоластаабыт 28 быыбардааччы бүллүтүөнэ хамыыһыйа чилиэннэрэ уонна кэтээн көрөөччүлэр баалларына арыллыбыттарын быһыытынан, куоласка ааҕылларын эттэ.
Биһиги хайдах куоластыырбытыттан дойду, өрөспүүбүлүкэ ханнык хайысханан сайдаллара эрэ буолбакка, хас биирдиибит дьылҕабыт тутулуктаах диэн санаанан салайтараннар, дьон быыбарга көхтөөхтүк кытталлар.
Ыйытыы балачча буолла.
Раиса СИБИРЯКОВА, “Саха сирэ”, edersaas.ru