СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников бүгүн, от ыйын 31 күнүгэр, ойуур баһаардарын утары охсуһууга суһал ыстаап хамыыһыйатын мунньаҕар, улуус баһылыктарыгар хат күөдьүйэн тахсар баһаардарга ураты болҕомтону уурарга, тэнийэр кыаҕы биэрбэккэ умулларарга күүһү-уоҕу туһаайарга эттэ.
Өймөкөөн, Уус Маайа, Алдан, Нерюнгри, Ленскэй, Мииринэй, Сунтаар, Үөһээ Бүлүү, Орто Халыма, Бүлүү улуустарын баһылыктара ойуур уотун умуруорууга ыытыллар үлэлэр тустарынан иһитиннэрдилэр. Ол кэнниттэн, Дмитрий Садовников Өймөкөөн оройуонугар уоту утары охсуһууга тэрээһин үлэтэ мөлтөҕүн ыйда. Кини онно миэстэтигэр үлэни сүрүннүүргэ СӨ баһаары утары сулууспа начаалынньыгын бастакы солбуйааччы Александр Трофимовы суһаллык ыытарга соруйда.
Оттон сарсын Алдаҥҥа зондировщик-сөмөлүөт үлэлиирэ былааннанар.
Мииринэй оройуонун баһылыга Александр Басыров оройуоҥҥа үс ойуур баһаара баарын эттэ. Кэнники хонукка икки ойуур баһаара умуруоруллубут. Ол иһигэр, бэҕэһээ киэһээ 20:00 чааска, Арыылаах сэлиэнньэтин таһыгар 80 гектрадаах сиринэн тайаабыт уоту умуруорбуттар. Сэлиэнньэ таһыгар Аччыгый Ботуобуйа утары баар уоту умуруорууга үлэ ыытыллар. «Ойуур уотун утары 239 киһи, 26 тиэхиньикэ үлэлиир. Ол иһигэр үс вездеход уонна түөрт булдьозер баар. Маны сэргэ, бүгүн баһаары умуруорууга Арассыыйа ЫБММ Ми-26 бөртөлүөтэ уонна уу кутар тэриллээх Ми-171 үлэлииллэр«, — диэн оройуон баһылыга эттэ.
Кэнники хонукка Алдан, Үөһээ Бүлүү, Кэбээйи, Мииринэй, Нерюнгри, Өймөкөөн, Таатта оройуоннарыгар барыта 13 ойуур баһаара, ону сэргэ, Өймөкөөн улууһугар атын категория сирдэргэ биир ландшафтнай баһаар умуруоруллубут.
Бүгүҥҥү туругунан өрөспүүбүлүкэ 16 улууһугар 24 ойуур баһаарын умуруорууга үлэ ыытыллар. Уоту утары охсуһууга 1 472 киһи, ол иһигэр 886 парашютнай-десантнай баһаарынай сулууспа байыаһа, ойуур баһаарын умулларыыга үлэлиир сулууспаттан 215 киһи, 146 — баһаары утары үлэлиир сулууспаттан, олохтоох нэһилиэнньэттэн 225 киһи бэйэлэрин баҕаларынан үлэлии сылдьаллар. 141 тиэхиньикэ үлэлиир.
Өрөбүллэргэ Саха сиригэр куйаас күннэр тураллар. Бүгүн күн устатыгар хоту, хотугулуу-арҕаа кыра, сорох сирдэринэн сөбүгэр соҕус ардах түһэрэ күүтүллэр. Арҕаа, Өлүөнэ аллараа тардыытынан, күнүс соҕуруу өттүгэр,соҕуруулуу-арҕаа быстахтаан ардыан сөп, сорох сирдэринэн этиҥнэниэ, этиҥнээх ардахха сөкүүндэҕэ 15-18 м.тыалырыа. Саха сирин киин өттүгэр нэдиэлэ иккис күнүттэн салгын температурата намтыа.