Өрөспүүбүлүкэ 100 сыллаах үбүлүөйүн көрсө учууталларга ыытыллыбыт куонкурус түмүгэ таҕыста. Саха сирин сүүс бастыҥ учуутала 100 тыһыынча солкуобайынан наҕараадаланыаҕа.
Санатан эттэххэ, бу куонкуруска сайаапкалары ылыы кулун тутартан саҕаламмыта. Куонкуруска барыта 305 киһи кытынна. Түмүгү таһаарыыга дьүүллүүр сүбэ кыттааччы өрөспүүбүлүкэ үөрэхтээһинигэр киллэрбит кылаатын, үөрэтэр бырагырааматын, туох саҥаны килэрбитин, үөрэнээччилэрин ситиһиилэрин, араас күрэхтэһиигэ, олимпиадаҕа кыттыыларын ордук чорботон көрдө. Куонкуруска орто, эбии үөрэхтээһиҥҥэ биэс сылтан итэҕэһэ суох үлэлээбит учууталлар, тириэньэрдэр кытыннылар.
Куонкуруһу СӨ үөрэҕин уонна наукатын министиэристибэтэ “Кэлэр көлүөнэ пуондатын”, Үөрэх сайдыытын уонна идэни үрдэтии институтун кытары кыттыһан ыытта. Кыайыылаахтарга харчынан көмөнү “РНГ” АУо оҥордо.
Аграфена КУЗЬМИНА