2021 сылга Саха сиригэр сайыҥҥы кэмҥэ уу суолунан 31 тыһыынча пассажиры тастылар. Бу 2020 сылы кытары тэҥнээтэххэ, 10 тыһыынча киһинэн элбэх.
— Кэнники 40 сылга аан бастаан өрөспүүбүлүкэтээҕи өрүс флотун саҥартыбыт. Чэпчэтиилээх лизинг бырагырааматынан түргэн сырыылаах, аныгы “Валдай 45Р” диэн 2 суудунаны атыыластыбыт. Бу саҥа теплоходтар Өлүөхүмэ аэропордугар сөмөлүөт түһэр-көтөр балаһатын оҥорор кэмҥэ олус туһалаатылар. Инникитин пассажирдары таһар түргэн сырыылаах суудуналары атыылаһар үлэ салҕаныаҕа. “Валдай 45Р” теплоходтары оҥорон таһаарар Р.Е. Алексеев аатынан Киин конструкторскай бюрону кытары бырабыыталыстыба бииргэ үлэлэһэргэ сөбүлэһии түһэрсибитэ. Собуокка Саха сиригэр анаан 2023-2025 сылларга “Метеор 120Р” диэн 3 суудунаны оҥоруохтара, — диэн Ил Дархан Айсен Николаев эттэ.
Тырааныспар уонна суол хаһаайыстыбатын министиэристибэтэ иһитиннэрэринэн, 2021 сыллаах навигация кэмигэр 756 рейс оҥоһуллубут, 15 социальнай суолталаах маршруттарынан 31 068 пассажиры тиэйбиттэр. Тэҥнээн көрдөххө, 2020 сыллаахха өрүс тырааныспара 528 рейси оҥорбут, 21 093 пассажиры тиэйбит.
Ангелина Васильева, “Саха сирэ” хаһыат, edersaas.ru