Кыһыҥҥы суолу арыйыыга ыытыллар үлэлэргэ күн-дьыл туруга харгыстары үөскэтэр диэн бүгүҥҥү мунньахха этилиннэ. Мунньаҕы СӨ Бырабыыталыстыбатын бэрэссэдээтэлин бастакы солбуйааччы Алексей Колодезников ыытта.
Кини бастатан туран үлэ-хамнас хаамыытын чопчуласта итиэннэ, билигин сэрэтии үлэтэ нэһилиэнньэҕэ күүскэ ыытыллыахтааҕын тоһоҕолоото. Туһааннаах тэрилтэлэргэ, ЫБММ Саха сиринээҕи салаатыгар информация тиһиктээхтик киллэриллиэхтээх диэтэ. Маны сэргэ, өрүскэ оҥоһуллар кыһыҥҥы суолга, туһааннаах сирдэринэн, ГИБДД уонна хамыыһыйалар үлэлэрин күүһүрдэргэ соруйда.
Мунньахха, бүгүҥҥү күҥҥэ икки кыһыҥҥы суол, Батамайтан Сиэгэн Күөлгэ (Кэбээйи) уонна Аллараа Халымаҕа Черскэйтэн Чукотка АУо диэки суол арыллыбыттара этилиннэ. Маныаха кыһыҥҥы суолу-ииһи оҥорууга үлэ кыраапыгынан ыытыллыбытын да иһин, болдьохтор күн-дьыл туругуттан сыҕарыйан биэриэхтэрин сөптөөҕө бэлиэтэннэ. Маныаха «Автомобильные дороги» генеральнай дириэктэрэ Семен Васильевич Филиппов кыһыҥҥы суол арылларыгар эмиэ күн-дьыл туругар сигэнэр.
Амма суолун оҥорууга Амма өрүс нөҥүө суолга хаары илиинэн ыраастааһын үлэтэ бара турар. Оттон Дьокуускай сиригэр-уотугар үс туоннаҕа диэри ыйааһыннаах көлөлөр сылдьалларыгар Хатас-Павловскай хайысхатынан өрүһүнэн сылдьар кыһыҥҥы суолу оҥорууга уу таһыма көтөҕүллүүтэ харгыһы үөскэтэ сылдьыбыт. Билигин кылаабынайа Мэҥэ Хаҥалас өртүттэн арыыга таҕыстахха биирдэ, кыра тыраахтарынан мууһу ыраастааһын уонна тоҥоруу үлэтэ ыытыллыахтаах диэн буолла.
“Арктика суоллара” генеральнай дириэктэрэ Владимир Владимирович Чусовской быйылгы кыстыгы көрсө 6300 км кыһыҥҥы суол оҥоһуутугар, хаары хомуйууга 104 техника уонна көмөҕө 100 техника үлэлиэхтээҕин иһитиннэрдэ. Маныаха быйыл муус 10-14 күн хойутаан тоҥмутунан, бигэргэтиллибит кыраапыктан күн-дьыл уларыйыыта учуоттаныллан, араастаһыы баар буолуоҕун ыйда.
Түмүккэ, бастатан туран, кыһыҥҥы суолу-ииһи оҥорууга үлэ салҕанарын бэлиэтээн туран, туох-ханнык иннинэ, куттал суох буолуутугар, сэрэтиигэ күүстээх үлэ барыахтааҕа өссө төгүл тоһоҕолонно.