«АЛРОСА-охрана» тэрилтэҕэ улахан суумалаах үбү-харчыны сымыйа докумуон оҥорон, тус хармааннарын хаҥаттыбыттарын туһунан ааспыт нэдиэлэҕэ Арассыыйа Куттал суох буолуутугар федеральнай управлениетын өрөспүүбүлүкэтээҕи салаата (УФСБ) иһитиннэрбитэ.
Силиэстийэ этэринэн, «АЛРОСА» хампаанньа Мииринэйгэ баар административнай тэрилтэлэригэр ыксаллаах быһыы-майгы үөскээтэҕинэ, баһаар буолбутун, эбийиэккэ туора дьон киирбитин тута сэрэтэр сигнализация тиэхиньиичэскэй тэрилин өрөмүөннүөхтээх эбиттэр.
«Чинчийэн көрүү кэнниттэн бу үлэ толору оҥоһуллубатаҕа биллибит. Ол эрэн, «АЛРОСА» хампаанньа «АЛРОСА-охрана» ХЭТ сымыйа счет-фактуранан өрөмүөн харчытын толору төлөөбүт», — диэн этэллэр УФСБ иһитиннэриитигэр. Онон билигин силиэстийэлиир, оперативнай ирдэһэр үлэ бара турар.
«ФСБ Управлениета киэҥ эйгэҕэ биллэрбит быһылаана 2016-2017 сылларга буолбут. Үбү-харчыны тустаах сыалга туттубатахтарын 2017 сыл бастакы аҥаарыгар «АЛРОСА» Куттал суох буолуутун сулууспата арыйбыта. Тэрилтэ иһинэн чинчийэн көрүү кэмигэр хомуллубут матырыйааллары салгыы УФСБ туттарбыттара. Ол иһин буруйу оҥорууну докумуоҥҥа киллэрэн, ирдэһэр үлэ барар турар. Манна олоҕуран, холуобунай дьыала көбүтүлүннэ. Өрөмүөн оҥорорго эппиэтинэстээх дьон өссө 2017 сыллаахха дуоһунастарыттан уһуллан, үлэлэриттэн ууратыллыбыттара», — диэн «АЛРОСА»-ҕа иһитиннэрдилэр.
Чуолкайдаан биэрдэххэ, туһааннаах тэрилтэни 2003 сыллаахха «АЛРОСА» хампаанньа тэрийбитэ.
Марианна Тыртыкова, «Саха сирэ», edersaas.ru