Бэс ыйын 3 күнүттэн атырдьах ыйын 1 күнүгэр диэри Национальнай ойуулуур-дьүһүннүүр түмэл «Үрүҥ күн. Белый день» диэн быыстапкаҕа ыҥырар.
Экспозиция күүтүүлээх күөх сайыны көрсүүгэ, уһун тымныы кыһын кэнниттэн мааны айылҕа уһуктуутугар, үгэс буолбут норуот бырааһынньыгар — ыһыахха ананар.
Худуоһунньуктар Саха сирин кэрэ айылҕатын, Өлүөнэ эбэни,туруук таас хайаларын өрө көтөҕүллэн туран уруһуйдаабыттара, хартыыналарыгар хоһуйбуттара көрүөхтэн дьикти, кэрэ. Маастардар болҕомтону тардар, көрөөччүнү сөхтөрөр, умсугутар ураты үлэлэригэр үрүҥ тунах ыһыаҕы, мааны мас, туос иһиттэри, сэргэни о.д.а. хоһуйбуттарын сөҕө, хайгыы көрүөххүт.
Быыстапкаҕа XVIII-XIX үйэлэргэ ураты талааннаах маастардар чочуйбут чочуонай чороонноро болҕомтону улаханнык тардаллар. Манна даҕатан эттэххэ, өр кэмҥэ ууруллан, хараллан сыппыт элбэх үлэ быыстапкаҕа туруорулунна. Онон киин куорат олохтоохторун, ыалдьыттарын, ускуустубаны сэргээччилэри, сыаналааччылары улаханнык сэҥээрдэрэ саарбахтаммат.
Быыстапка бэс ыйын 3 күнүттэн атырдьах ыйын 1 күнүгэр диэри СӨ Национальнай художественнай түмэлигэр үлэлиир.
Түмэл аадырыһа: Дьокуускай куорат, Киров уул. 9, 2-3 мэндиэмэннэр фойелара. Кэлиҥ, көрүҥ, сэргэхсийиҥ, сэҥээриҥ.
+1
+1
+1
+1
+1
+1
+1