Дьокуускайга үрүҥ көмүс волонтердар бастакы бэстибээллэрэ буолан ааста. 10 улуустан 143 волонтер кэлэн икки күн устата алтыстылар, уопуттарын үллэһиннилэр. Бэстибээл “Демография. Старшее поколение” национальнай бырайыак эрэгийиэннээҕи «Вместе к активному долголетию 55+» бырагырааматын чэрчитинэн ыытылынна. Бу тэрээһин биэнсийэлээхтэр олоххо тардыһыыларын, уопсастыбаннай олоххо көхтөрүн күүһүрдэр сыаллаах ыытыллар.
Ол курдук, аҕам саастаах волонтердар хамсааһыннарын сайыннарар туһунан төгүрүк остуол, психологическай трениннэр, ырытыһыылар, үөрэтэр бырагыраамалар, кэнсиэр, Доҕордоһуу киэһэтэ, үҥкүүлүүр флешмоб, о.д.а. буоллулар.
Аҕам саастаах волонтердар хамсааһыннара 2014 сылтан Сочи олимпиадатыттан саҕаламмыта. Дьокуускайга Юрий Гагарин аатынан култуура, аныгы ускуустуба киинигэр былырыын “Молоды душой” диэн үрүҥ көмүс волонтердар кииннэрэ аһыллыбыта. Ил Дархан граныгар 2020 сыллаахха аан бастаан “волонтерство” хайысха баар буолбута, ол чэрчитинэн, 8 мөлүйүөн солкуобай көрүллүбүтэ. Бу хайысха сыллата кэҥээн иһэр.
Үрүҥ көмүс волонтердар биэнсийэҕэ тахсан да баран, дьиэҕэ олорон хаалбакка, айар үлэ, култуура, спорт өттүнэн көхтөөхтөр, олоххо уопуттарын, билиилэрин-көрүүлэрин үллэстэргэ, дьоҥҥо көмөлөһөргө бэлэмнэр. Өрсөпүүбүлүкэтээҕи, Бүтүн Арассыыйатааҕы, аан дойдутааҕы пуорумнарга, бэстибээллэргэ көхтөөхтүк кытталлар. Үйэлэрин-саастарын тухары үлэлээн-хамсаан, өрөспүүбүлүкэ сайдыытыгар бэйэлэрин кылааттарын киллэрбиттэрэ, оҕолорун, сиэннэрин иитиитигэр үгүс сыраларын уурбуттара. Ол иһин судаарыстыба кинилэргэ көмөлөһөр туһуттан элбэх миэрэлэри ылынар.
Пандемия кэмигэр араас улуустартан, нэһилиэктэртэн аҕам саастаах дьон үһүс саас оскуолатын, “Победа” ресурснай киин нөҥүө онлайн көрүҥүнэн элбэх тэрээһиннэргэ, көрсүһүүлэргэ, үөрэтэр маастар-кылаастарга дьарыктаммыттара, бириэмэлэрин туһалаахтык атаарбыттара.
Ангелина Васильева, “Саха сирэ” хаһыат, edersaas.ru
Хаартыска: СИА.