Мэҥэ Хаҥаласка, Мэлдьэхси нэһилиэгэр, 650-тан тахса ынах сүөһү кыстыкка киирдэ. Нэһилиэккэ баар 11 бааһынай хаһаайыстыба уопсайа 212 туонна үүтү туттарда.
Холобур, Анатолий Кривогорницын 2015 сылтан бааһынай хаһаайыстыба тэринэн үлэлиир. Быйыл 17 ынаҕа төрөөн, 12 туонна үүтү туттарда.
Кини улууска хотон тутуутугар ыытыллыбыт куонкуруска кыттан, көмүскээн, өйөбүл ылан, үп көрүллэн, 50 миэстэлээх каркаснай хотону Семен Сокольников, Иннокентий Захаров, Иван Кривогорницын, Василий Оконешников, Ньургун Попов уонна бэйэтэ буолан, тутан үлэҕэ киллэрдилэр. Хаста да нэһилиэк дьаһалтатыттан көмө-субуотунньук ыытыллыбыта.
Анатолий Кривогорницын бу саҥа хотоҥҥо бэйэтин сүөһүтүн таһынан, эбии уонча ыал сүөһүтүн көрүөхтээх.
Аалай лиэнтэ кырыллан, саҥа хотон үөрүүлээхтик аһылынна. Үлэ бэтэрээнэ Аграфена Васильева ынаҕын сиэтэн киллэрэн, хаһаайыстыбаҕа туттарда.
Сахалыы сиэринэн аал уоту аһатан, арчылаан, алгыһын тиэртэ Алгыстаана. Кэлбит дьону айах тутан күндүлээтилэр. Мэҥэ Хаҥалас улууһун тыатын хаһаайыстыбатын управлениетын начаалынньыга Иннокентий Семенов дьоро күнүнэн эҕэрдэлээн туран, Анатолий Кривогорницыҥҥа уонна үлэлэспит дьоҥҥо улуус аатыттан сэмэй бэлэхтэри туттарда. Нэһилиэккэ тыа хаһаайыстыбата салгыы сайдарын туһугар бу бачыымы дьон өйүүрүгэр ыҥырда.
Аҕа баһылык Валерий Никифоров нэһилиэкпитигэр сүөһү ахсаана аччатыллыбакка, маннык хотоннор тутулланнар, бэйэтэ кыайыа суох киһи сүөһүтүн көрдөрөрүгэр олус туһалааҕын ыйан туран, үлэлээбит дьоҥҥо истиҥ махтал суруктары, бэлэхтэри туттарда. Хаһаайыстыба баһылыга эмиэ сэмэй бэлэхтэрин анаата.
Саҥа хотоҥҥо төрүөх төрөлүйдун, үрүҥ илгэ үрүлүйэ сүүрдүн, эмис эт дэлэйдин!
«Саха сирэ» хаһыат, edersaas.ru саайтка анаан Надежда Андросова,
Мэҥэ Хаҥалас, Мэлдьэхси.