Суһал-медицинскэй көмө киинэ – Өрөспүүбүлүкэтээҕи 2 №-дээх балыыһа олунньу ортото «Виртуальная мисс больницы» куонкурус кыттыылаахтарыгар интэриниэтинэн куоластааһын түмүгүн таһаарбыта.
Балыыһа 19 кэрэ аҥаарыттан 8 кыыс иккис туурга тахсыбыта. Дьэ, ол кэннэ, түмүгү таһаарар долгутуулаах куонкурус ыытылынна.
Түмүк тэрээһиҥҥэ кыргыттар бэйэлэрин, үлэлэрин-хамнастарын, дьарыктарын билиһиннэрдилэр. Айар талаан түһүмэҕэр үрүҥ халааттаах аанньаллар бары ыллаан, үҥкүүлээн, хомуска оонньоон, араас уобарастарга уларыйан көрөөччүлэргэ биһирэттилэр.
Куонкурус кыттыылаахтара астаабыт бүлүүдэлэрин көрөн, саалаҕа мустубут ыалдьыттар ааттаах-суоллаах эрэстээннэрдээҕэр итэҕэһэ суох дьикти минньигэс астар бэлэмнэммиттэрин итэҕэйдилэр. Дэлэҕэ даҕаны, куонкуруһу иилээн-саҕалаан ыытааччы: «Дьүүллүүр сүбэ остуола бүгүн сыбаайба мааны сандалытын курдук!» диэн сөҕүө, хайгыа дуо?
Кэрэ куолар салгыы киэһээҥи былааччыйанан тахсыылара биир саамай күүтүүлээх уонна долгутуулаах түгэнинэн буолла. Кинилэр сценаҕа бииртэн биир тахсан хааман долгулдьуйуулара дьоро киэһэни өссө ситэрэн-хоторон, тупсаран биэрдэ. Онон бу киэһэ Эдэр көрөөччү тыйаатырын саалата ыалдьааччылар үөрүүлээх хаһыыларынан хаһааҥҥытааҕар да оргуйан олордо. Кыттааччылары биир идэлээхтэрэ эмиэ өйөөн, ыллаан-үҥкүүлээн көмөлөстүлэр. Кинилэр ис сүрэхтэриттэн долгуйан, оҥостон, бэлэмнэнэн кэлбиттэрэ чахчы билиннэ. Кимнээх эрэ биир таҥастаахтар-саптаахтар, кимнээх эрэ былакааттара элбэҕэ, чаҕылхайа сөхтөрдө.
Дьүүллүүр сүбэҕэ режиссер-продюсер, «Хомуур хапсагай» уонна «Хаар Айан» куонкурустары тэрийээччи Константин Барашков, Эдэр көрөөччү тыйаатырын артыыһа Эрхан Нохоев, «Ураанхай» кулууп уонна аныгы панкратион федерациятын президенэ Алексей Лаптев, СӨ профсоюһун федерациятын ыччакка сэбиэтин бэрэссэдээтэлин солбуйааччы Светлана Петрова уонна Өрөспүүбүлүкэтээҕи 2 №-дээх балыыһа пресс-сулууспатын салайааччы Зоя Игнатьева үлэлээтилэр.
Куонкурус түмүгүн таһаарыы, хаһан баҕарар буоларын курдук, улахан долгутуулаах буолла. Дьүүллүүр сүбэ быһаарыытынан:
«Мисс Вдохновение» – эпэрээссийэлиир киин отделение медицинскэй сиэстэрэтэ Ирена Сивцева;
«Мисс Нежность» – клиническэй-лабораторнай отдел лаборант-фельдшерэ Анастасия Илларионова;
«Мисс Очарование» – хирургия 2 №-дээх отделениетын сиэстэрэтэ Сардана Афанасьева;
«Приз зрительских симпатий» – Аина Попова;
«Мисс Оригинальность” – приемнай отделение сиэстэрэтэ Надежда Лаврова;
«Мисс Грация» – Ньургуйаана Прибылых;
«Вице Виртуальная мисс» – балыыһа эпидемиолог-бырааһа Күннэй Яковлева,
«Виртуальная мисс Республиканской больницы №2» – физиотерапия отделениетын сиэстэрэтэ Альбина Егорова буоллулар.
Кыайыылаахха куонкурус сүрүн бирииһин – саҕынньаҕы балыыһа кылаабынай бырааһа Борис Андреев үөрүүлээх быһыыга-майгыга туттарда. Кини куонкурус бары кыттааччыларын эҕэрдэлээтэ, балыыһа профкомугар, Эдэр көрөөччү тыйаатырын дириэктэрэ Алексей Павловка, тыйаатыр ыалдьытымсах кэлэктиибигиэр махтанна.
«Биһиги ыарыһахтарбытын маннык кэрэ кыргыттар арыаллыыллара олус кэрэхсэбиллээх», – диэтэ балыыһа кылаабынай бырааһа. Кырдьыга да, кэрэ, кыраһыабай буолуу аан дойдуну быыһыыр.
Зоя ИГНАТЬЕВА, Дьокуускай.