Бүгүн Сырдык Паасха күнүгэр эҕэрдэ уонна махтал бастыҥа эмчиттэргэ ананар.
edersaas.ru
Коронавирус турбут кэмигэр, бу дьаҥтан быыһаан ылааччыларбытынан биһиги бары эрэнэр дьоммут, үрүҥ халааттаах аанньалларбыт буолаллар.
Бу күннэргэ Тымныы полюһун Өймөкөөн улууһун батсаап бөлөхтөрүгэр өрөспүүбүлүкэ кылаабынай инфекционист бырааһа, медицинэ наукатын дуоктара Снежана Слепцова аатыгар махтал тыллар бастыҥнара этиллэр.
«Улахан кутталлаах ыарыы туран, дьон-сэргэ уйулҕата хамсаабыт кэмигэр, үрүҥ халааттаах аанньалларбыт барахсаттар биһиги доруобуйабыт харысхалыгар күүскэ турунан үлэлии сылдьаллар. Ордук чорботон, инфекционистар хара бастакыттан бириэмэни, сынньалаҥы аахсыбакка ылсыбыттарын бэлиэтиэххэ наада. Онуоха өрөспүүбүлүкэ кылаабынай инфекционист-бырааһа, медицинэ наукатын дуоктара Снежана Слепцова быһаччы салайан, эмчиттэр турунуулаахтык үлэлээбиттэрин бэлиэтиибит. Ол да иһин Саха сирэ бу ыарыыны бохсорго толору бэлэмнээх көрүстэ.
Снежана Спиридоновнаны кытта биһиги үгүстүк алтыспыт дьон, кинини эмчит уонна киһи быһыытынан үрдүктүк сыаналыыбыт уонна истиҥник саныыбыт, ытыктыыбыт. Үрүҥ халааттаах аанньалга дьон-сэргэ убаастабыла, махтала уһун дьоллоох олоҕу, үлэтигэр өссө үрдүк ситиһиини тосхойдун!», — диэн Лена Колесова уонна педагогическай үлэ бэтэрээнэ Александра Тихонова батсаапка суруйааттарын кытта, өймөкөөннөр иилэ хабан ылан, бөлөх аайы бэйэлэрин кыыстарыгар барҕа махталларын тиэртилэр. Ону барытын бииргэ холбоон, маннык буолан таҕыста:
«Күндү киһибитинэн, кыыспытынан Снежана Спиридоновнанан киэн туттабыт. Эн чиҥ билииҥ, үлэҕэр бэриниилээҕиҥ Саха сирин эмчиттэрэ туруунуулаахтык ылсан сыстыганнаах дьаҥы бохсоллоругар төһүү күүһүнэн буолла. Үрүҥ халааттаах аанньалбытыгар баҕарабыт кытаанах доруобуйаны, дьиэ кэргэҥҥэр дьолу-соргуну, тапталы, өйөбүлү, үлэҕэр өссө үрдүк ситиһиилэри. Эйиигин бэйэҕин куруук Аанньалларыҥ араҥаччылаатыннар. Дьон доруобуйатын иһин охсуһар үлэлээх дьон бу күннэргэ олус ыктарыылаахтык үлэлии сылдьаргытын билэбит, өйдүүбүт.
Снежана Спиридоновнаҕа дьон истиҥ тылы аныылларыттан биһиги, өймөкөөннөр, бэйэбит хайҕаммыт курдук сананабыт, кыыспытынан киэн туттабыт! Медицинэ наукатын дуоктара, ХИФУ профессора Снежана Слепцованан сирэйдээн ыарахан дьаҥы утары охсуһар үрүҥ халааттаах аанньалларбытыгар, бырааһыттан санитаркаларга тиийэ бука барыларыгар сүгүрүйэбит, махтанабыт!
Снежана Спирдоновнаны — айылҕаттан дьону эмтииргэ ананан кэлбит үтүө, кэрэ киһини, дириҥ билиилээх эмчити ис сүрэхпититтэн Сырдык Паасха күнүнэн эҕэрдэлиибит! Эйиигин тус бэйэҕин уонна эн биир идэлээхтэргин Таҥара өрүү арыаллыы сырыттын. Снежана Спиридоновна, бүгүҥҥүҥ курдук куруук күлэ-үөрэ сырыт, уустук үлэлээх киһи айылҕа киэҥ ыллыгынан эрэллээхтик хааман ис. Оҕобутугар ыраас салгынынан төрөөбүт дойдугуттан алгыспытын ыытабыт…
… СӨ доруобуйа харыстабылын туйгуна Снежана Слепцова олоҕун устата өрүү «туйгун» диэн өйдөбүлү кытта ыкса сибээстээх. Ол курдук, кини 1991 с. Өймөкөөн улууһун Томтор орто оскуолатын «туйгунунан» бүтэрэн, кыһыл көмүс мэтээлинэн бэлиэтэммитэ. 1997 сыллаахха СГУ медицинэҕэ факультетын туйгуннук бүтэрэн кыһыл диплому ылбыта. Инфекционнай ыарыыларга клиническэй ординатураны бүтэрэн, үлэтин хайысхата бу салаанан салаллыбыта. Снежана Спиридоновна ассистентан кафедра сэбиэдиссэйигэр тиийэ үүммүтэ. 2004 с. – медицинэ наукатын кандидатынан, 2014 с. – медицинэ наукатын дуоктарынан буолбута. Өрөспүүбүлүкэ кылаабынай инфекционист-бырааһа, ХИФУ мединститутун дириэктэрин солбуйааччы Снежана Слепцова инфекционистар Евроазиатскай уопсастыбаларын чилиэнэ.
Бүгүҥҥү Сырдык Паасха күнүнэн эн биир дойдулаахтарыҥ истиҥ эҕэрдэлэригэр кыттыһабыт, күндү үрүҥ халааттаах аанньалбыт Снежана Спиридоновна!
Елена ПОТОЦКАЯ, «Саха сирэ» хаһыат, edersaas.ru
Хаартыска — интэриниэттэн.