Мэдиссиинэ үлэһитин күнүн (бэс ыйын 19 күнэ) көрсө Дьокуускай куоракка өрөспүүбүлүкэ саалатыгар олохторун эмчит идэтигэр анаабыт дьону чиэстээтилэр.
Федеральнай уонна өрөспүүбүлүкэтээҕи судаарыстыбаннай наҕараадалары СӨ баһылыгын дьаһалтатын солбуйааччы Георгий Михайлов туттарда.
Кини Арассыыйа бэрэсидьиэнэ Владимир Путин дьон доруобуйатын, олоҕун уонна доруобуйаҕа куттал суох буоларын дьоһун суолталааҕынан ааттаабытын санатта.
Георгий Михайлов: «Саха сирин Ил Дархана Айсен Николаев салалтатынан биһиги өрөспүүбүлүкэбитигэр доруобуйа харыстабылын бөдөҥ эбийиэктэрин тутууга улахан күүс уонна үп көрүллэрэ, биллэн турар, салаа салҕыы сайдарыгар көмөлөһөр.
Өрөспүүбүлүкэбитигэр ковиды утары охсуһарга 9 192 эмчит үлэлээтэ», -– диэн мэдиссиинискэй үлэһиттэр коронавирус инфекциятын утары охсуһууга кылааттарын ураты бэлиэтээтэ.
Чиэстээһин кыттыылаахтара коронавируһу утары охсуһарга өлбүт мэдиссиинискэй үлэһиттэри кэриэстээн, саҥата суох туран ыллылар.
Пирогов уордьанынан бэйэлэрин ытык иэстэрин толоро сылдьан коронавирустан өлбүт эмчиттэр- Өрөспүүбүлүкэтээҕи 3 №-дээх килиниичэскэй балыыһа ренгенолаборана Мария Бочкарева, «Фтизиатрия» научнай-бырактыычаскай киин отделениетын сэбиэдиссэйэ Иннокентий Винокуров уонна Нам улууһун Оройуоннааҕы киин балыыһатын бырааһа Федор Протопопов наҕараадаланнылар (өлбүттэрин кэннэ). Наҕараадалары аймахтарыгар уонна дьиэ кэргэннэрин чилиэннэригэр туттардылар.
СӨ доруобуйа харыстабылын миниистирэ Лена Афанасьева мэдиссиинискэй үлэһиттэргэ барыларыгар өрөспүүбүлүкэ олохтоохторун доруобуйаларын бөҕөргөтүүгэ үлэлэрин, идэлэрин үрдүк таһымнарын уонна бэйэ дьыалатыгар бэриниилээх тапталларын иһин махтанна.
Мэдиссиинискэй үлэһиттэргэ Пирогов уордьана, «Уһук Илин сайдыытыгар өҥөтүн иһин» туйгун бэлиэ, «СӨ үтүөлээх бырааһа» уонна «СӨ доруобуйатын харыстабылын үтүөлээх үлэһитэ» бочуоттаах ааттар, СӨ Ил Дарханын грамоталара уонна Махтал суруктара, «Гражданскай килбиэн» бэлиэ, эрэгийиэн бырабыыталыстыбатын грамоталара уонна махталлара, ону сэргэ СӨ Доруобуйа харыстабылын биэдэмэстибэлэрин наҕараадалара туттарылыннылар.
Быһаарыы:
Саха сирин доруобуйатын харыстабылыгар 21 тыһыынча курдук киһи үлэлиир. Кинилэртэн:
5 136 -– быраас;
11 350 -– орто сүһүөх мэдиссиинискэй үлэһит;
3 805 -– алын сүһүөх мэдиссиинискэй үлэһит.
Надежда ЕГОРОВА, «Саха сирэ», edersaas.ru