Балаҕан ыйын 29 күнүгэр доруобуйа харыстабылын эйгэтигэр долгутуулаах түгэн буолан ааста. Медицина салаатыгар «Норуот биһирэбилэ» өрөспүүбүлүкэтээҕи уопсастыбаннай бириэмийэлэр кыайыылаахтарга туттарылыннылар.
edersaas.ru
Эрдэ суруйбуппут курдук, өрөспүүбүлүкэ эмтиир тэрилтэлэрэ бу бириэмийэҕэ бэйэлэрин кандидатураларын уопсай куоластааһыҥҥа түһэрбиттэрэ.
Норуот биһирэбилин ылар кыахтаах эмчиттэр ортолоругар быраастар, сиэстэрэлэр, акушеркалар, санитаркалар, администратордар, хаһаайыстыбаннай үлэһиттэр, суоппардар уо.д.а. бааллара.
Кыайыылаах аатын ыларга киирсибит 76 киһи туһугар Арассыыйа куораттарыттан, Уһук Илинтэн уо.д.а. 300-чэ тыһыынча киһи куоластаата.
Бириэмийэлэри туттарыы өрө көтөҕүллүүлээхтик ааста. Ол туһунан «Норуот биһирэбилэ» бириэмийэҕэ хара маҥнайгыттан үлэлэспит, СӨ Өрөспүүбүлүкэтээҕи балыыһатын пресс-сэкирээтэрэ Зоя Игнатьева:
– Үөрүүлээх чааспыт дьэ, тиийэн кэллэ. Аҥаардас биир тэрээһиҥҥэ маннык элбэх дьэрэкээн сибэккилэри мин көрбөтөҕүм ыраатта. Сибэккилэри киһи хараҕа халтарыйар корзиналарыгар уонна илиилэригэр тутан киирдилэр. Үрүҥ оруосалар Национальнай художественнай мусуой бу күҥҥэ анаммыт сценатын киэргэттилэр, – диэн үөрэн-көтөн туран кэпсээтэ.
«Норуот биһирэбилэ» бириэмийэни туттарыы сиэригэр-туомугар кыттааччылар эрэ буолбакка, кинилэри өйүүр доҕотторо, биир идэлээхтэрэ, оҕолоро, сиэннэрэ кэлбиттэр. Бириэмийэҕэ түһэриллибит эмчиттэр хас биирдиилэрэ кыһыл доруосканан дуоһуйа хаамта, доруобуйа харыстабылын миниистирэ Михаил Охлопковтан бириэмийэни тутта.
Тэрийээччилэр маннык үөрүүлээх сиэр-туом үгэстэрин барытын тутустулар, ол эбэтэр номинациялар кыайыылаахтарын бүгүн эрэ үөрүүлээх быһыы-майгы кэмигэр биллэрдилэр. Кыайыылаахтар ааттара суруллубут кэмбиэрдэри өрөспүүбүлүкэ биллиилээх дьоно мустубут дьон ортотугар арыйдылар.
Бириэмийэ ааптара Семен Посельскай:
- Барыта олус бэркэ ааста. Бүгүҥҥү бырааһынньыгы доруобуйа харыстабылын үлэһиттэригэр Оскар бириэмийэтин туттарыыга тэҥнээх бастакы улахан дьаһалынан ааттыахха сөп, – диэн киэн тутта эттэ.
Норуот билиниитин кимнээх ыллылар?
«Идэҕэ бэриниилээх буолуу» («Верность профессии») номинация – травматолог-ортопед, Өрөспүүбүлүкэтээҕи 2 №-дээх балыыһа кылаабынай бырааһа, травматологическай-ортопедическай отделение сэбиэдиссэйэ Анатолий КОМИССАРОВ;
«Медицина тускутун туһугар» («Во благо медицины») – Таатта улууһун киин балыыһатын терапияҕа отделениетын санитарката Елена КОЛОДЕЗНИКОВА;
«Сүрэхпин оҕолорго биэрэбин» («Сердце отдаю детям») – Аллайыаха улууһун киин балыыһатын үрдүк категориялаах педиатр-бырааһа Нина АНТОНОВА;
«Амарах сүрэх сиэстэрэтэ» («Сестра милосердия») – үрдүк категориялаах фельдшер, Бүлүү улууһун П.А.Петров аатынан киин балыыһа суһал медицинскэй көмө отделениетын сэбиэдиссэйэ Любовь КАРАТАЕВА;
«Биһиги тапталлаах бырааспыт» («Наш любимый врач») – Уус Алдан улууһун Г.Г.Никифоров аатынан киин балыыһатын Кэптэни учаастактааҕы балыыһатын терапевт-бырааһа Раиса ПЕТУХОВА;
«Идэҕэ уһуннук үлэлээһин» («Профессиональное долголетие») анал номинация – Таатта улууһун киин балыыһатын Баайаҕа учаастактааҕы балыыһатын фельдшерэ Александра АНИСИМОВА.
Миниистир Михаил Охлопков эрэннэрбитинэн, «Норуот биһирэбилэ» бириэмийэ аны сыл аайы ыытыллар буолуоҕа.
«Норуот биһирэбилэ» өрөспүүбүлүкэтээҕи уопсастыбаннай бириэмийэни туттарыы туһунан биэриини алтынньы 7 күнүгэр «Саха» телевидениетыгар көрүҥ.
Надежда ЕГОРОВА, «Саха сирэ» хаһыат, edersaas.ru
Зоя ИГНАТЬЕВА, Назар АММОСОВ түһэриилэрэ