Анаабыр Үрүҥ Хайатын олохтоохторо ыаллыы Красноярскай кыраай долганнарын кытта хардарыта сылдьыһаллар, билсэллэр эбит. Былыргыта биир төрүттээх Турухаан кыраайын долганнара этилэр буоллаҕа. Үрүҥ Хайаттан Попигай 150, Сындааска 180 км тэйиччи сыталлар. Хотугу хоһууттар сүүрбэччэ көстөн иҥнибэттэр.
edersaas.ru
Социалистическай Үлэ Дьоруойа Илья Спиридонов аатынан муниципальнай хаһаайыстыба табаһыттара, 6 эр киһи уонна 1 дьахтар, ааспыт субуотаҕа хаартан иҥнибэт, сыыдам сырыылаах омук тимир көлөлөрүнэн Сындааскаҕа сүүрдэн тиийэн күрэхтэһэн кэллилэр. Сүүрдүөхтээх табаларын анал күрүөлээх сыарҕа оҥорон тиэйэллэр эбит.
Сындааскалар үс табанан сүүрдэ үөрүйэх буоллахтарына, үрүҥ хайалар сыарҕаҕа икки табаны көлүнэллэр. Онон Красноярскай табаһыттарын сыарҕалара Анаабыр киэнинээҕэр кэтит буолар үһү. Сындааска хаара туустаах буолан, сүүрдэргэ ыарахан дииллэр. Бука, синньигэс сыарҕа хаары хайытара ордук буолуо.
Күрэхтэһии сүрүн бириистэрин Роснефть хампаанньа туруорбут. Сыаналаахтарын барытын, сындааскалары сарылаппытынан, Үрүҥ Хайа хоһууттара сотон кэллилэр. Ол курдук, эр дьоҥҥо бастаабыт 1-кы ыстаада биригэдьиирэ Владимир Туприн “Буран” көлөнү, иккис миэстэлэммит ити ыстаада табаһыта Олег Туприн оҥочо мотуорун, үһүстээбит 2-с ыстаада биригэдьиирэ Анатолий Попов оһохтоох балаакканы ылбыттар. Дьахталлар сүүрдүүлэригэр 2-с ыстаада аатыттан кыттыбыт Кэрэчээнэ Попова-Куличкина кыайыылааҕынан тахсан, саҥа “Бураны” сүүрдэн кэллэ.
Манна сыһыаран эттэххэ, удьуор табаһыт Поповтар быйыл күннэрэ тахсан сылдьар. Анаабыр улууһа соторутааҕыта ыыппыт слетугар 2-с ыстаада настаабынньыга, Анатолий уонна Кэрэчээнэ аҕалара Валериан Попов табанан сүүрдүүгэ бастаан, “Скидо” (АХШ) уонна “Буран” көлөлөрү бириискэ ылбыт. Ону таһынан, хамаанданан бастаабыттарыгар “Буран” биэрбиттэрин ыстаада тутаах үлэһиттэригэр — чуумсук Екатерина, табаһыт Анисим Туприннар дьиэ кэргэттэригэр анаабыттар. Ити күрэхтэһиигэ улуус дьаһалтата барыта 5 снегоходу (3 “Буран” уонна 1 “Скидо”, 1 “Пурпос” (Япония) туруорбут. “Айфон-10” смартфон курдук “бытархай” бириистэрдиин холбоон, 3 мөл. солк. фондалаах бириис оонньоммут.
Үрүҥ Хайаҕа сылдьан көрдөххө, киһи барыта “Ямаха”-нан эрэ көтүтэр. Онон “Буран”-ы өссө мыыналлар. Баара бэрт буоллаҕа!
Василий НИКИФОРОВ, edersaas.ru