Интэриэһинэй Сүрүн Уопсастыба

Үрүҥ Хайа оскуолата биисинэс-инкубатордаах

Анаабыр улууһун Үрүҥ Хайа нэһилиэгин орто оскуолата 2015 сылтан агрохайысханан үлэлиир.

Оскуола иһинэн биисинэс-инкубатор тэриллэн ситиһиилээхтик үлэлиирэ бэлиэтэнэр. Оҕолору төрүт үгэскэ — таба иитиитигэр дьарыктыыллар, оҕуруот олордоллор, киоска да үлэлэтэллэр. Бу туһунан оскуола дириэктэрэ Суруяна Неустроева санаатын үллэһиннэ:

Биисинэс- инкубатор оскуолабыт иһинэн үлэлиир. Оскуолабытыгар, уопсайа, быйылгы үөрэх дьылынан 197 оҕо баар. Биисинэс-инкубаторбыт салайааччытытынан эдэр исписэлиис Александра Иннокентьевна үлэлиир, оттон төрүттээччи Валентина Владимировна Спиридонова икки сыл устата ситиһиилээхтик үлэлэппитэ. Инкубаторбытыгар парикмахерскай, атыы киоската, кондитерскай бааллар. Соторутааҕыта кофемашина ылбыппыт. Онон туорах кофены үлтүрүтэн оҥорон, табаһыттар сүлүөттэригэр кофе-брейк тэрийбиттэрэ. Маны сэргэ, МУП Спиридоновы кытта дуогабардаһан урукку өттүгэр 50 табаны ылбыппыт. Бэйэбит сирбит суох буолан ыстаадаҕа сылдьаллар. Онон идэҕэ туһаайыыга оскуола үрдүкү кылааһын оҕолоро табаһыт идэтигэр эмиэ үөрэнэллэр. Оскуолабыт табатыттан идэһэ оҥорон, сүлүөккэ  кэтилиэт, тефтель, голубцы эмиэ атыылаабыттара. Маны сэргэ, 5 уонна  8 кылаастар бырайыак көмүскээн оҕуруот олордуутунан дьарыктаналлар. Номнуо сибиэһэй укроп, күөх луук амсайдыбыт. Оҕолор үлэлэрин түмүгүн көрөн астыналлар.

Биһиги агро хайысхалаах буоламмыт АГАТУ кытта ыкса үлэлэһэбит. Уһүс разрядтаах табаһыт идэтин баһылыырга үөрэтэллэрэ. Билигин бу идэ теориятын Туприна Светлана Ильинична кэлэн оскуолаҕа үөрэтэр. Манна 9, 10, 11 кылаастар үөрэнэллэр. Быраактыканы ыстаадаҕа бараллар. Ол курдук күһүҥҥүттэн табаһыттары, бэтэринээрдэри кытта тэҥҥэ сылдьан такайыллаллар. Бу үлэлэрин иһин хамнас аахсаллар. Ол иһин уолаттар астынан туран илии-атах буола сылдьаллар. Быйыл МУП-тары кытта таба тириитин хатарыытыгар үлэлэстибит. Оскуолабыт былаһааккатыгар сүүсчэкэ таба тириитин кууртубут-хатардыбыт.  Нэһилиэкпит ытык киһитэ, олохтоох табаһыт Григорий  Карпович Попов оскуолаҕа кэлэн оҕолорго таба төбөтүн сүлүүгэ маастар-кылаас көрдөрдө. Оҕолор тэҥинэн сүлэн, табаһыт сатыахтаах маастарыстыбатыгар ситиһиилээхтик үөрэннилэр. Төбөлөрбүт аҥаардарын оскуола, аҥаардарын МУП ылбыта. Онон оскуолабытыгар үлэ күөстүү оргуйар. Оҕону идэҕэ туһаайыыга оскуола сааһыыттан иитии суолтата улахан  диэн маннык үлэлэри тэрийэбит.

 

Хаартыскалар Үрүҥ Хайа оскуолатын архыыбыттан туһанылыннылар.

 

Ульяна Захарова.

1
0