Анаабыр улууһун Үрүҥ Хайа нэһилиэгэр былырыыҥҥыттан киэҥ-куоҥ, аныгылыы тупсаҕай бырайыактаах култуура киинин тутуута саҕаланан, силигэ ситэн эрэр. Бу тутуу өрөспүүбүлүкэ хоту оройуоннарыгар саамай улаханынан буолар. Уопсайа 1600 кв миэтэрэ иэннээх, икки мэндиэмэннээх, толору хааччыллыылаах.
edersaas.ru
ulus.media саайт суруйарынан, Култуура киинин «ВИД» диэн тэрилтэ тутар («Профстрой» диэн тутуу хампаанньатын бөлөҕөр киирсэр). Тэрилтэ урукку сылларга Сунтаарга 24 кыбартыыралаах олорор дьиэни, баһаарынай пууну, хочуолунайы, 240 миэстэлээх оҕо саадын туппут. Оттон дьэ Анаабырга кэлэн, улахан тутуу ыыта сылдьаллар. Тутуу биригэдьиирэ Альберт Игнатьев иһитиннэрбитинэн, уопсайа 70-ча киһи үлэлээн ааспыт.
“Биһиги олохтоох дьону эмиэ үлэлэтэбит. Холобур, теплотрассаны олохтоох сыбаарсыктарга тартарбыппыт. Электриктарбыт биригээдэлэригэр билигин эмиэ олохтоохтор үлэлииллэр. Маннык эбийиэги аан бастаан туттарабын. Бырайыагын «Проектное бюро «Старт» ХЭТ оҥорбута. Кинилэри кытта мэлдьи сибээскэ олоробут, туох эмиэ сыыһа-халты таҕыстаҕына, тута быһаарсан иһэбит. Бу эбийиэк тас быһыыта үс араас геометрическай фигура холбоспута буолар: трапеция, полукруг уонна призма. Олору биир сиргэ холбообут курдук быһыылаах. Бастаан тимир каркаас туруорбуппут, онтон ол тимир каркааска сэндвич-панеллары таҥмыппыт. Саамай ыарахана, каркааһын туруоруу этэ, тыаллаах баҕайы буолан, кыраан көтөҕөн турдаҕына, тыал эмискэ үрэн троспут быстар эбэтэр тыалтан панель кэлэн сааллар, ол кутталлаах. Ону этэҥҥэ ааһан, аны ис үлэтин оҥоро сылдьабыт. 260 миэстэлээх сүрүн саала ис өттө олус кыраһыабай дизайннаах, национальнай оһуордаах-мандардаах, муостата ковролин, сымнаҕас олбохтордоох. Кииҥҥэ 60 миэстэлээх киинэ тыйаатыра, бибилэтиэкэ, остолобуой, гримернай хостор бааллар”, — диэн кэпсээтэ.
Онон, ыраах хоту олорор үрүҥ хайалар саҥа ураты көстүүлээх култуура кииннэнэн абыраннылар.
ulus.media саайт, «Анаабыр уоттара» хаһыат матырыйааллара туһанылыннылар, edersaas.ru