«Үрүҥ хаар алгыһынан»: суруйааччылар Евразия литератураларын туһунан төгүрүк остуолга кэпсэттилэр

«Үрүҥ хаар алгыһынан» норуоттар икки ардыларынааҕы алтыс төгүлүн ыытыллар поэзия түһүлгэтэ Дьокуускай куоракка бүгүҥҥүттэн саҕаланна. Тэрээһин чэрчитинэн өрөспүүбүлүкэтээҕи пресс-кииҥҥэ «Евразия музата: бэҕэһээ, бүгүн, сарсын» диэн тиэмэлээх «төгүрүк остуол» ыытылынна.

Поэзия түһүлгэтин кыттыылаахтарын «Сахамедиа РИИХ» АУо генеральнай дириэктэрин э.т. Виктор Колесов эҕэрдэлээтэ. Саха сирин суруйааччыларын сойууһун бэрэссэдээтэлэ Наталья Харлампьева поэзия түһүлгэтин суолтатын, литературалар алтыһыыларын бэлиэтээн туран, бүгүҥҥү тэрээһин кыттыылаахтарын билиһиннэрдэ. Быйылгы бэстибээлгэ Казахстантан, Кыргызстантан, Хакасияттан, Карелияттан, Калугаттан, Татарстантан, Башкирияттан, Москваттан поэттар, суруйааччылар кэллилэр.

Калуга суруйааччыларын сойууһун бэрэссэдээтэлэ Вадим Терехин литературалар алтыһыыларын, уус-уран тылбаас туһунан кэпсээтэ. Кини этиитин салҕаан Хакасия Өрөспүүбүлүкэтин култууратын үтүөлээх үлэһитэ, поэт, тылбаасчыт Наталья Ахпашева түүр норуоттар литератураларын нуучча литературата биир ситимниирин, нуучча тылын нөҥүө тылбааһынан литературалар доҕордоһуулара улахан суолталааҕын бэлиэтээтэ.

«Төгүрүк остуолга» судаарыстыбаннай сүбэһит, СӨ Духуобунаһын академиятын бэрэсидьиэнэ Андрей Борисов, саха народнай суруйааччыта, Арассыыйа суруйааччыларын сойууһун хос бэрэсэдээтэлэ, П.А.Ойуунускай аатынан Литературнай музей дириэктэрэ Николай Лугинов, социологическай наук доктора, психологическай наука кандидата, ЮНЕСКО дьыалаларыгар хамыыһыйа чилиэнэ Ульяна Винокурова, филологическай наука кандидата Жанна Бурцева кыттыыны ыллылар.

Аграфена КУЗЬМИНА.