Култуура Сүрүн

“Үрүҥ хаар алгыһынан” бэстибээл кыттааччылара кэллилэр

Бүгүҥҥүттэн Дьокуускай куоракка “Үрүҥ хаар алгыһынан” норуоттар икки ардыларынааҕы поэзия бэстибээлэ саҕаланна. Быйылгы тэрээһин САССР тэриллибитэ 100 сылын көрсө ыытыллыаҕа.

Быйылгы поэзия күнүгэр Азербайджантан, Кыргызстантан, Казахстантан, Карелияттан, Калуга уобалаһыттан,  Башкортостантан, Мурманскайтан, Хакасияттан, Татарстантан, Москваттан поэттар, суруйааччылар Аида Эйвазова, Алтынай Темирова, Саят Камшыгер, Елена Пиетеляйнен, Вадим Терехин, Заки Алибаев, Илья Виноградов, Наталья Ахпашева, Рафис Корбан, Рузаль Мухаметшин, Борис Лукин, Карина Сейдаметова кэллилэр.

Бэстибээл кыттыылаахтара бүгүн саха норуодунай суруйааччылара Семен уонна Софрон Даниловтар пааматынньыктарыгар сибэкки дьөрбөтүн ууруохтара. Эбиэттэн киэһэ 15 чаастан “Евразия музата: бэҕэһээ, бүгүн, сарсын” диэн литература сайдыытыгар “төгүрүк остуолга” кыттыахтара. Тэрээһиннэри ыытыыга хааччахтар киирэннэр, бэстибээл туох баар санитарнай-эпидемиологическай ирдэбиллэри тутуһан сабыылаах ыытыллар. Тэрээһиннэр быһа сибээһинэн “Сахамедиа” холдинг “Ютуб” канаалыгар, “Зум” канаалыгар көстүөхтэрэ. “Төгүрүк остуол” быһа сибээһинэн бүгүн 15 чааска “Сахамедиа” холдинг “Ютуб” канаалыгар көстүөҕэ.

Салгыы поэттар, суруйааччылар М.К.Аммосов аатынан Хотугулуу-илиҥҥи федеральнай университет бэрэсидьиэнин Евгения Михайлованы кытары көрсүөхтэрэ.

Киэһэ 18 чааска ХИФУ кыра саалатыгар бэстибээл аһыллыыта буолуоҕа.

Бэстибээл үөрүүлээх аһыллыытын быһа сибээһинэн бу ссылканан киирэн көрүөххүтүн сөп: https://zoom.us/j/97465726202?pwd=VE9BakpvOEhodnhvR3U0ZUV0dE1VUT09

Аграфена КУЗЬМИНА.

1
0