Култуура Маны аах

«Үрүҥ хаар алгыһа» бэстибээл бэйиэттэрдиин биэчэригэр…

Бу күннэргэ Дьокуускайга «Үрүҥ хаар алгыһынан» диэн норуоттар икки ардыларынааҕы поэзия түһүлгэтэ буола турар. Бэстибээл быйыл номнуо алтыс сылын ыытыллар. Казахстан, Кыргызстан, Хакасия, Карелия, Калуга, Татарстан, Башкирия, Москва бэйиэттэрэ, суруйааччылара биһиги өрөспүүбүлүкэбитигэр үрүҥ хаар алгыһын ылына бүгүн, алтынньы 27 күнүгэр, поэзия биэчэригэр кытыннылар.

Пандемия буолан үгүс киһини муспакка, бу тэрээһин ZOOM-платформанан хоһоону таптааччыларга ураты эйгэни бэлэхтээтэ. Өрөспүүбүлүкэбит биллиилээх бэйиэттэрэ хоһооннорун ыалдьыттары кытта ааҕыылара сөҕүмэр буолла. Маны этэн эрдэхтэрэ, хоһоон түһүлгэтэ иэйиини үөскэтэр диэн. Саха Өрөспүүбүлүкэтин норуодунай суруйааччыта, бэйиэт Наталья Харлампьева, «Чолбон» сурунаал бас эрэдээктэрэ Гаврил Андросов, Николай Винокуров — Урсун, Елена Слепцова — Куорсуннаах, бэйиэттэр  Рустам Каженкин, Зина Архипова, Лиза Мигалкина, Яна Байгожаева,  ыалдьыттары кытта хоһоон аахтылар. Поэзия хонуутугар умсан, астына-дуоһуйа хоһоону истии – көстүбэт кынакка уйдаран ыраах кэрэ поэзия дойдутугар айан буоллаҕа…

Бырааттыы норуоттар литератураларын биир быстыспат ситимэ тылбаас буолар. Норуот өйө-санаата айымньытыгар көстөр. Тылбаастаммыт айымньы иккистээн тиллэр. Оттон бу бэстибээл биһиэхэ чахчы да үрүҥ хаар алгыһа буолан саҥалыы иэйиини уһугуннарар, саҥалыы айымньылары үүннэрэр.

Жанна Леонтьева, бэйиэт, суруналыыс:

— Мин «Үрүҥ Хаар алгыһынан» бэстибээли биирдэ да көтүтэ иликпин. Балаҕан  ыйын бүтүүтэ кыргыз кыыһын Уулжан Даулетбекова кинигэтин сүрэхтэниитигэр сылдьыбытым. «Дневник мигранта» диэн кинигэ этэ. Манна сылдьан урут мин хоһооннорбун тылбаастаабыт Алтынай Темированы санаан кэлбитим. Алтынай биһиги Ойуунускайбытын кыргызтыы саҥардыбыт дэгиттэр талааннаах суруйааччы. Бу бэстибээлгэ Алтынай кэлэрин истэн наһаа соһуйбутум да, үөрбүтүм да. Алтынай Темированы Киргизияҕа Саха сирин посуола дииллэрин истибитим. Бэйиэттэр ыалдьыттары кытта хоһоон аахпыттарын наһаа астынным. Тэрийээччилэргэ махталбын тиэрдэбин.

Ульяна ЗАХАРОВА.

Жанна Леонтьева хаартыскаҕа түһэриилэрэ.

2
0