Бүгүн – Өрөспүүбүлүкэ күнэ. Саха сирин олохтооҕор улахан суолталаах күн. Саха сирин араас муннугар олорор хомусчуттар, биирдиилээн хомус куттаах дьон Өрөспүүбүлүкэ өрөгөй ырыатын хомуһунан толордулар.
“Билиҥҥи тыҥаан турар балаһыанньанан үлэ барыта алтыспакка толорулларынан сибээстээн, Хомус аан дойдутааҕы киинэ уонна түмэлэ Өрөспүүбүлүкэ күнүн көрсө “СӨ өрөгөйүн ырыатын — хомуһунан” диэн флешмобу биллэрбиппит. Сахалыы төрөөбүт тылынан суруллубут өрөгөй ырыата хомус төрүт дорҕоонунан доҕуһуолланнаҕына, истээччи сүрэҕэр өссө ордук тиийиэ диэн санааттан толкуйдаммыта.
Хас биирдии толорооччу бэйэтин тустаах күннүгэр, инстаграмҥа киллэрэн #ГимнЯкутииНаХомусе хештегы суруйан бу флешмобка кыттыһар. Күн бүгүн тэрээһиҥҥэ 150-ча киһи кытынна”, — диэн Хомус түмэлин дириэктэрэ Дмитрий Бястинов кэпсиир.
Тэрээһин иитинэн киэҥ нэлэмэн Саха сирин араас муннугуттан видеолар кэлбиттэр. Кэрэхсэбиллээҕэ диэн, хомус эйгэтигэр сыһыаннаах чопчу дьон буолбакка, саха төрүт үнүстүрүмүөнүгэр сэҥээрэн тардар, сүгүрүйэр биирдиилээн дьон уонна оскуола оҕолоро бэйэлэрин дорҕооннорун таһааран иһитиннэрдилэр. Ол курдук, Өрөспүүбүлүкэ күнүнэн Саха сирин олохтоохторун Чурапчы улууһуттан “Айылгы” ансаамбыл уонна Мэҥэ Хаҥалас Табаҕатын үөрэнээччилэрэ эҕэрдэлииллэр.
Людмила ПОПОВА, edersaas.ru
Видео, хаартыска – Хомус түмэлиттэн.