Аллайыахаҕа “Үрүҥ эһэ суолунан” эспэдииссийэ ыытылынна

Ааптар: 
Бөлөххө киир:

Аллайыаха улууһунааҕы айылҕа харыстабылын иниспиэксийэтэ сылын аайы “Үрүҥ эһэ суолунан” (“Медвежий патруль”) эспэдииссийэҕэ кыттар. Аҕыйах хонуктааҕыта үһүө буолан ыраах айантан эргилиннилэр. Патруллааһыҥҥа улуустааҕы иниспиэксийэ начаалынньыгын сэргэ Чокуурдаах олохтоохторо Юрий уонна Иван Рожиннар кытыннылар. Кинилэр Чокурдаахтан Илин Сибиир муоратыгар тиийэ бураанынан  төттөрү-таары 900 км айаннаатылар.

Быйылгы сырыыларыгар үгэс курдук үрүҥ эһэ суолун суоллаан-иистээн, арҕахтан тахсыбыт оҕолоох эһэ ахсаанын ааҕа, “Кыталык” айылҕа судаарыстыбаннай заказнигын сиригэр-уотугар кэтээн көрүүнү ыыта барбыттара. Айанньыттар кэтээн көрбүттэринэн, быйыл муораҕа буурҕа аҕыйахтык түспүтэ биллэр эбит. Урукку дьыллардааҕар хаар көпсөркөй буолан, ааспыт кыыл-сүөл суола ырылыйа сытарын бэлиэтииллэр. Хапташинскай дьаар ханнык эрэ үрэҕиттэн тахсан, Хоромой хомотун диэки биир оҕолоох үрүҥ эһэ хаампыт суолун көрбүттэр. Уонна атын сиргэ үрүҥ эһэ суолун көрбөтөхтөр. Дьиҥэ, муораҕа 30 км иһирдьэ киирэ сылдьыбыттар. Моҕотоойобо күөлүгэр баран урут арҕах булбут сирдэрин чинчийбиттэр да, тугу да булбатахтар.

Ол оннугар муораҕа кыыл, кырса суолларыгар түбэспиттэр. Муора кытылынан биир бөрө хаампыт суолун көрбүттэр. Хата, туллуктар кэлбиттэрин тымныыта бэрдиттэн хаартыскаҕа кыайан түһэрбэтэхтэриттэн хомойоллор. Бу айаннарыгар айылҕаны харыстааччылар сэттэ күн сырыттылар. “Айан ыраах, тымныы, сирэйбит да үлүйдэ”, — дэһэллэр.

Бэлэмнээтэ Женни Стрюкова

Хаартысканы: улуустааҕы иниспиэксийэ тиксэрдэ

+1
0
+1
0
+1
0
+1
0
+1
0
+1
0
+1
0