Ааспыт нэдиэлэҕэ Орто Халыма оройуонугар нэһилиэнньэлээх пуун аттыгар үрүҥ эһэ оҕото бэйдиэ сылдьарын көрбүттэрэ. Ийэтиттэн хаалбыт быһыылаах диэн быһаараллар эрээри, ити чуолкайа суох. edersaas.ru
Итини СӨ Айылҕа харыстабылын министиэристибэтэ хонтуруолга ылла. Орто Халыматааҕы айылҕа харыстабылын иниспиэксийэтин начаалынньыга Иван Белогонов миэстэтигэр тиийэн билистэ. Эрдэтээҥи дааннайынан, үрүҥ эһэ биир да сааһын туола илик диэн этэ эрээри, исписэлиистэр икки саастаах диэн быһаардылар.
Билигин эһэ оҕотун тутуу боппуруоһа быһаарыллар. Тустаах министиэристибэ исписэлиистэрэ тутан ылан, Эһэлэр арыыларыгар ыытыахтарын баҕараллар эбэтэр Дьокуускайга «Орто дойду» зоопаркаҕа аҕалары толкуйдууллар. Ол гынан баран, өрөспүүбүлүкэтээҕи зоопаркаҕа сөптөөх миэстэ уонна усулуобуйа суох. Билиҥҥи туругунан, эһэ оҕотун Москватааҕы зоопарка ыларын биллэрдэ.
Онон бу күннэргэ эһэ оҕотун тутуохтара. Анал исписэлиистэр уонна «Орто дойду» зоопарка бэтэринээрэ барыахтара. Салгыы эһэчээн дьылҕатын edersaas.ru сайтка биллэрэ туруохпут.
Александр ТАРАСОВ, «Саха сирэ» хаһыат, edersaas.ru