Бу өрөбүллэргэ киин куорат Комсомольскай болуоссатыгар үгэс буолбут «Саха сирин балыга-2019″ быыстапка-дьаарбаҥка буолуоҕа.
edersaas.ru
Бу улахан тэрээһиҥҥэ хотугу уонна Арктическай улуустартанбалыктааһынан дьарыктанар 25 хаһаайыстыба уонна балык аһы астыыр кэпэрэтииптэр кыттыыны ылыахтара. Куорат олохтоохторо уонна ыалдьыттар удамыр сыанаҕа чыыр, муксуун, онтон да атын күндү үрүҥ балыктары атыылаһыахтара.
Балык бырааһынньыгар кэлбит ыалдьыттар араас күрэхтэһиилэргэ кыттыахтара, хоту дойду талааннара мустубут кэнсиэрдэрин дуоһуйа көрүөхтэрэ. Биллэн турар, балык кыһыытын курдук үгэс буолбут куонкурус үгүс дьону түмүөҕэ. Саамай улахан балыгы талар «Ыраахтааҕы Балык» («Царь-рыба») аукциона ыытыллыаҕа. Сибиэһэй балыктан оҥоһуллубут минньигэс миини эмиэ амсайыахха сөп.
Быйыл 8-с төгүлүн ыытыллар дьаарбаҥка атыылааччыга да, атыылаһааччыга да икки өттүттэн барыстаах: балыксыттар бородууксуйаларын хамаҕатык батарыахтара, оттон атыылаһааччылар талбыт балыктарын удамыр сыанаҕа атыылаһыахтара.
«Саха сирин балыга-2019» быыстапка-дьаарбаҥканы Тыа хаһаайыстыбатын министиэристибэтэ, Атыы-эргиэн бырамыысыланнай балаататын сойууһа, СӨ Балык хаһаайыстыбаларын ассоциацията тэрийэллэр.
Елена ПОТОЦКАЯ, «Саха сирэ» хаһыат, edersaas.ru
Хаартыска — интэриниэттэн.