Пандемия саҕаланыаҕыттан Саха сиригэр 35 785 киһи коронавируснай инфекциянан ыалдьыбыт, 33 133 киһи үтүөрбүт, 609 киһи өлбүт. Пандемия саҕаланыаҕыттан 1 мөлүйүөн 62 тыһыынчаттан тахса анаалыс оҥоһуллубут.
Ыам ыйын 6 күнүнээҕи туругунан, өрөспүүбүлүкэҕэ 134 084 устуука вакцина кэлбититтэн, 80,9%-на дьоҥҥо бэриллибит. Бастакы укуолу 108 389 киһи (ол иһигэр 27 941 аҕам саастаах киһи), иккиһи 80 149 киһи (19 313 аҕам саастаах киһи) ылбыт.
Өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрбитинэн, бырааһынньык, өрөбүл күннэргэ вакцинация тохтообот. Бастатан туран, аҕам саастаахтарга биэрэллэр, ол гынан баран, ким баҕарар олорор сиринэн сыһыарыллыбыт поликлиникаҕа, мобильнай пууҥҥа тиийэн, быһыыны ылыан сөп. Кини бэтэрээннэри эҕэрдэлииргэ харыстанар миэрэлэри кытаанахтык тутуһарга ыҥырда.
Ангелина Васильева, “Саха сирэ” хаһыат, edersaas.ru
Хаартыска: ria.ru