Бүгүн, субуотаҕа, өрөспүүбүлүкэ суһал штабын салайааччытын солбуйааччы Ольга Балабкина коронавирус дьаҥын туругун билиһиннэрдэ.
Ольга Валерьевна этэринэн, 53 саҥа ыалдьыбыт киһи ааспыт сууккаҕа бэлиэтэммит. Ити ыарыһахтартан 42 киһи – Дьокуускайга. Кинилэр сүрүннээн ОРЗ-тан сылтаан температуралара тахсан, ити түмүгэр пневмониялаан ыалдьыбыттар. Биэс киһи Дьааҥыга ыалдьыбыта билиннэ. Баатаҕайга дьон уолуйбаттарыгар сүбэлээтэ. Ол гынан баран балаһыанньа хонтуруолга тутуллуохтаах.
Бары истэ сылдьарбыт курдук, Алдаҥҥа бүгүҥҥү туругунан 4 киһи дьаҥҥа хаптарбыта итиннэ психоневрологическай балыыһаҕа үөскээбит балаһыанньаны кытта сибээстээх. Маны сэргэ Нерюнгригэ, Мииринэйгэ коронавируһунан биирдии киһи сутуллубут.
Штаб салайааччытын солбуйааччы этэринэн, Дьокуускайга 11 дьиэ (здание) бу хамсык кэмигэр стационар быһыытынан туһанылынна. Балартан сорохторун сыыйа сабыахтара. Оройуоннарга куойка сорҕотун эмиэ аҕыйатан эрэллэр.
— Субуота уонна өрөбүл күннэргэ сэрэхтээх буолуохха. Ордук куорат таһыгар тахсар буоллаххытына. Биһиэхэ биллибитинэн, 11,5 тыһыынча оҕо оройуоннарга тиийдэ. Сорох төрөппүттэр, хомойуох иһин, эппиэтинэһэ суох сыһыаннаһан, оҕолоро тыаҕа тиийбиттэрин туһунан олохтоох уорганнары сэрэппэтилэр. Оҕолор онно олохтоох салайыныы уорганнарыгар учуокка турдахтарына, эмчиттэр көрөллөрүгэр-истэллэригэр табыгастаах буолуоҕа, — диэтэ Ольга Балабкина.
Кини өссө Чурапчы оройуонугар үбүлүөйгэ элбэх дьон мустуутун кытта дьаҥ сибээстээҕин аҕынна. Быһата, өрүү буоларын курдук, О.Балабкина дьону-сэргэни маассабай түмсүүлэр дьаҥ тарҕанарыгар кутталлаахтарын туһунан сэрэттэ.
Женни СТРЮКОВА бэлэмнээтэ
Хаартыскаҕа: О.Балабкина