Бу күннэргэ батсаабынан тарҕаммыт иһитиннэрии олоҕо суоҕа билиннэ. Урукку иһитиннэриини тарҕаппыттар эбит. Бу өрөбүллэргэ уопсастыбаннай тырааныспар, маҕаһыыннар үлэлииллэр.
edersaas.ru
Субуотаны, баскыһыанньаны таһынан, бэс ыйын 22, 24 күннэрэ эмиэ өрөбүл күнүнэн биллэриллибиттэрэ. Дьокуускай куорат баһылыга Сардаана Авксентьева бу уһун өрөбүллэргэ санитарнай күннэр буолбаттарын туһунан иһитиннэрдэ. Ону тэҥэ, Мэдиссиинэ үлэһиттэрин күнүгэр кинилэргэ бэлэх кэриэтэ, бэйэни харыстанан, санитарнай миэрэлэри тутуһан сылдьарга сүбэлээтэ.
— Коронавируһунан ыалдьыбыт дьонтон чиэппэрин кэриҥэ – оҕолор. Оннооҕор коронавирустаах биир оҕо Кавасаки синдромнааҕа билиннэ. Бу ыарахан ыарыы туһунан билбэт дьон “гугллаан” көрүҥ. Оҕолор чэпчэкитик ыалдьаллар, ол эрээри, төрөппүттэрин сыһыараллара, бачча куйааска инфекционнай балыыһаҕа киирэн сыталлара туох үчүгэйдээҕий? Ол иһин оҕолоргутун харыстааҥ, уопсастыбаннай миэстэлэргэ, оҕо былаһааккаларыгар сырытыннарымаҥ! Ыһыах кэмигэр кэлиэгэлэр, аймахтар, доҕоттор буолан көрсүһүмэҥ, бырааһынньыктаамаҥ! Уопсастыбаннай сирдэргэ мааската суох сылдьар, элбэх дьону мунньар буоллахха, ыстарааптаан иһиэхпит, — диэн сэрэттэ.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.