Өрөбүл уонна бырааһынньык күннэригэр арыгы атыыта бобуллуон сөп
СӨ Арыгы атыытын хонтуруоллуур уонна лицензиялыыр управление арыгылааһыны утары үлэни өссө кытаатыннарар былааннаах. Арыгы атыытын хааччахтыыр туһунан сокуон олоххо киириэҕиттэн, ол аата 2010 сылтан саҕалаан итирдэр утаҕынан эргинэр маҕаһыын ахсаана 38% аҕыйаата.
Аҕыйах хонуктааҕыта ыытыллыбыт Ил Түмэн пленарнай мунньаҕар арыгы атыытын хааччахтыыр туһунан сокуон олоххо киириэҕиттэн, өрөспүүбүлүкэҕэ быһыы-майгы төһө уларыйбытын туһунан иһитиннэриини СӨ Арыгы атыытын хонтуруоллуур уонна лицензиялыыр управление салайааччыта Матвей Лыткин оҥордо. Өрөспүүбүлүкэ үрдүнэн билигин 146 сэлиэнньэҕэ арыгы атыыламмат. Холобур, Үөһээ Бүлүү улууһун 21 сэлиэнньэтиттэн 14-гэр, Нам 19-с сэлиэнньэтиттэн 10-гар, Мэҥэ Хаҥалас 32 сэлиэнньэтиттэн 16-гар итирдэр утаҕы атыылыыртан аккаастанан олороллор. Туһааннаах управление РФ Доруобуйа харыстабылын министиэристибэтэ таһаарбыт көҕүлээһинин өйөөн, өрөбүл уонна бырааһынньык күннэргэ итиэннэ Арктика улуустарыгар арыгы атыытын бобор туһунан этии киллэрдэ.
Анивера Акимова, «Саха сирэ» хаһыат, edersaas.ru