Дойду бэрэсидьиэнэ Владимир Путин ыйааҕынан, кулун тутар 30 күнүттэн муус устар 30 күнүгэр диэри уһун өрөбүл күннэр биллэриллибиттэрэ. Ол чэрчитинэн, үлэ, социальнай сайдыы министиэристибэтэ үлэ төлөбүрүгэр маннык быһаарыылары биэрэр.
edersaas.ru
Уһун өрөбүллэргэ хамнас төлөнөр. Оттон үлэһиккэ төһө үлэни оҥорбутунан хамнас төлөнөр буоллаҕына, үлэни биэрээччи ылыммыт нуорма аахтатынан көрөн, эбии төлөбүрү (вознаграждение) төлүөхтээх. Бу ороскуот суумата үлэ төлөбүрүн ороскуотугар тэҥнэһэр.
Үлэһит бу кэмҥэ уоппускаҕа сылдьар буоллаҕына, уһун өрөбүл күннэр уоппускаҕа киирбэттэр, уһаабат.
Бу өрөбүл уонна бырааһынньык күннэрэ буолбатахтар, онон үрдүк кээмэйинэн төлөммөттөр.
Сорох олох-дьаһах хаамыытын хааччыйар тэрилтэлэр (аптекалар, социальнай хааччыйыы, энэргиэтикэ, таһаҕаһы тиэйии, мэдиссиинэ тэрилтэлэрин, аһынан-үөлүнэн, наадалаах табаарынан хааччыйар маҕаһыыннар, бырамыысыланнас, уо.д.а.) үлэһиттэригэр уһун өрөбүл диэн суох. Бу үлэһиттэр, кыаллар буоллаҕына, дьиэлэриттэн олорон үлэлиэхтэрин сөп. Үлэни биэрээччи онно табыгастаах усулуобуйаны тэрийиэхтээх.
Бу боппуруостарга туох эмэ кэһии таҕыстаҕына, ыйытыылаах буоллаххытына, СӨ үлэҕэ, социальнай сайдыы министиэристибэтэ арыйбыт суһал нүөмэригэр эрийиэххитин сөп: 8800 100 14 03.
Ону тэҥэ, дьуһуурунай исписэлиистэр сарсыарда 8 чаастан киэһэ 10 чааска диэри ыйытыыларга эппиэттииллэр:
Социальнай көмө миэрэлэринэн – 42-18-70.
Социальнай хааччыйыы – 8924 867 8913, 8924 867 8858.
Үлэ сыһыаннарынан – 50-80-75.
Уопсай боппуруостарынан – 50-80-49.
Ангелина Васильева, «Саха сирэ» хаһыат, edersaas.ru
Хаартыска: smolnarod.ru