QR-куода суох хайдах буолабын?

Бэҕэһээ, алтынньы 27 күнүгэр, Роспотребнадзор Саха сиринээҕи управлениетын салайааччы Маргарита Игнатьева социальнай ситимнэртэн быһа эпииргэ таҕыста. 

Маргарита Егоровна иһитиннэрбитинэн, билигин нэһилиэнньэ 80%-а быһыыны ыллаҕына биирдэ күргүөм иммунитет үөскүүр. Билиҥҥи туругунан, өрөспүүбүлүкэ үрдүнэн 67% эрэ оҥоһуллубут. Быһыыны ылыыга Аллайыаха, Муома улуустара инники күөҥҥэ сылдьаллар эбит, манна 90% былааннарын толордулар.

Эпиир кэмигэр Маргарита Игнатьеваҕа ыйытыылар киирдилэр.

— Хаачахтыыр миэрэлэр төһө уһуохтарай?

— Тугу да эрдэ этэр кыах суох. Дьаҥ туругуттан, дьон быһыыны төһө хото ыларыттан тутулуктаах. Билиҥҥи туругунан, ыарыы таһыма үрдүүр. Суһал ыстаап быһаарыаҕа.

— QR-куоду кимнээх көрөр, маныыр буолуохтарай?

— Бу куодунан киириини-тахсыыны тэрилтэлэргэ сыһыарыллыбыт үлэһиттэр хонтуруоллуохтара. Куоду көрдөрөргө хайаан даҕаны пааспардаах сылдьыллыахтаах.

— Ханнык сиргэ, миэстэҕэ сылдьан ыарыыны хабыахха сөбүй?

— Элбэх дьон мустар сирэ барыта сэрэхтээх. Ордук дьиэ иһинээҕи сабыылаах сирдэр кутталлаахтар. Онон маасканы кэтии ирдэнэр.

— Тоҕо култуура кииннэрэ, тыйаатырдар үлэлииллэрий?

— Репертуардара былааҥҥа киирбит буолан, саалаларга 50% толору дьонноох үлэлииллэр. Атын тэрээһин ыытыллара бобуллар.

— Мин коронавирус дьаҥар хаптаран, чэпчэкитик аһардан дьиэҕэ эмтэммитим. ПЦР-анаалыһым ыарыы суоҕун көрдөрөр, онон ханнык да куодум суох. Биэрбэттэр, хайдах буолабын?

— QR-куода суох ирдэнэр сирдэргэ киллэрбэттэр. Эһиги мэдиссиинэ үлэһиттэриттэн көмө ылан, Арассыйа реестригэр ыалдьыбыттар ахсааннарыгар киириэхтээх этигит.

— Ыалдьыбыт дьонноох уопсай дьиэлэр подъезтарын урукку курдук дезинфекциялыыллар дуо?

— Оҥоһуллуохтаах, бу өҥөнү салайар хампаанньа ыытыахтаах. Оттон ыалдьааччы дьиэҕэ сытан эмтэнэр буоллаҕына, бу эбэһээт толоруллуохтаах.

— ПЦР-анаалыһа төһө түргэнник оҥоһулларый?

— Түөрт чаас устатыгар анаалыс туттарбыт киһи анаалыһа биллиэхтээх. Бүгүҥҥү күҥҥэ өрөспүүбүлүкэҕэ 12 анаалыс оҥорор лаборатория үлэлиир. Онтон алтата — оройуоҥҥа. Сууккаҕа 5,5 тыһыынча анаалыс оҥоһуллар. Хоту улуустарга анаалыс тиэрдиллиитэ сөмөлүөт көтүүтүттэн тутулуктаах буолан бытаарыан сөп.

— Мин оҕо күүтэр ийэбин. Методводтаахпын. Ханна да куода суох көҥүллэммэт боллаҕына хайдах буолабын?

— Өскөтүн эн оҕо күүтэр ийэ буоллаххына, бэйэҕин, оҕоҕун харыстаан элбэх дьонноох сиргэ сылдьыа суохтааххын. Эйигин харыстаан чугас дьонуҥ бары быһыыны ылбыттарыгар саарбахтаабаппын.

Ульяна ЗАХАРОВА.