Владимир Путин оҕону көрөн олоруу босуобуйата 3375 солкуобайтан 6751 солкуобайга диэри улаатар диэн эппитин кэнниттэн, үгүс дьон мунаарда. Чахчыта, босуобуйа арааһа элбэх буолан, киһи мунаарара сөп курдук. Оччотугар, бу ханнык босуобуйа туһунан этиллэрий?
Бу босуобуйаны бастакы оҕотун 1,5 сааһыгар диэри көрөн олорор ийэ, аҕа ылар бырааптаахтар. Ол эрээри, ийэ хат сылдьан, эбэтэр төрөппүттэртэн биирдэстэрэ оҕо көрөн олорор кэмигэр урбаанньыт, нотариус, албакаат тэрилтэтэ сабыллыытыгар түбэһэн, үлэтэ суох хаалбыт буоллаҕына, төрөппүттэртэн биирдэстэрэ булгуччулаах социальнай страховкалааһыҥҥа хабыллыбат буоллаҕына (күнүскү үөрэххэ үөрэнэр устудьуон, үлэтэ суох), эбэтэр тулаайах оҕону көрөр кэмигэр үлэлээбэт аймах киһиэхэ ананар.
Саха сиригэр бастакы оҕоҕо босуобуйа кээмэйэ – 4726 солкуобай, иккис уонна онтон кэлэр оҕоҕо – 9425 солкуобай. Бэрэсидьиэн этиитинэн, бастакы оҕоҕо босуобуйа икки төгүл үрдээн, 9452 солкуобайга тэҥнэһэр. Иккис, үһүс оҕоҕо үрдүүрэ биллибэт.
Босуобуйа үрдээһинэ ыарахан кэмҥэ көмүскэлэ суох социальнай араҥаны – устудьуоннары, үлэтэ суох хаалбыт дьону өйүүр сыаллаах. Оттон үлэлии сылдьан төрөөн, оҕо көрөн олорор ийэлэр булгуччулаах социальнай страховкалаах буолан, быдан үрдүк босуобуйаны ылаллар.
Ангелина Васильева, «Саха сирэ» хаһыат, edersaas.ru
Хаартыска: интэриниэттэн