“Рэп ылланыахтаах. Мин итэҕэллээх дьоммор сүрдээх үчүгэй рэпердэр бааллар. Ол эрээри ыччакка наркотигы, араас содур быһыыны көҕүлүүр тоҕо нааданый?” – диэн хоруйдаата РФ бэрэсидьиэнэ Владимир Путин пресс-конференциятын кэмигэр “Интерфакс” суруналыыһын ыйытыытыгар.
Санатан эттэххэ, Дьокуускайга Элджей диэн ырыаһыт гастроллуу кэлэрин уопсастыбаннас утарсан, кэнсиэрэ ыытыллыбатаҕа. Бу биһиэхэ эрэ буолбакка атын эрэгийиэннэргэ эмиэ хатыламмыт. Манна туһаайан Владимир Владимирович: “Култуура хаһан баҕарар таһыма үрдүк буолуохтаах. Ол ону куһаҕан тылынан киртитэн намыһах таһымҥа түһэрэр наадата суох. Култуура киһи сиэрин-майгытын үрдэтиэхтээх. Наркотигы, араас содур быһыыны ыччакка көҕүлүүр тоҕо нааданый? Ити уопсастыбаны, нацияны таҥнары тардар. Бу быһыыны биһириир буолуохтааҕар, көрөр да, истэр да наадата суох. Ол оннугар ыччаппыт интэриэһин атыҥҥа тардыаҕыҥ, туһулуоҕуҥ. Холобур, волонтерствоҕа. Манна даҕатан өссө этиэм этэ, содур быһыыны көҕүлээһини утарынан бобор эмиэ сыыһа, манна кэпсэтии, дьүүллэһии, дьоҥҥо өйдөтүү наада”, — диэн эттэ.
РФ бэрэсидьиэнэ Владимир Путин бүгүн Москваҕа үгэскэ кубулуйбут улахан пресс-конференциятын ыыта олорор. Бэрэсидьиэн бу сылы түмүктүүр 14-с пресс-конференцията. Тэрээһин саҕаланыыта Владимир Владимирович Арассыыйа экэниэмикэтэ сайдан иһэрин, быйыл бүддьүөт аан бастакытын профицикка тахсыбытын бэлиэтээн эттэ.
Аграфена КУЗЬМИНА, “Саха сирэ” хаһыат.