Дойду бэрэсидьиэнэ Владимир Путин дьиэ кэргэҥҥэ бастакы уонна иккис оҕо төрөөтөҕүнэ бэриллэр ыйдааҕы төлөбүргэ НДФЛ нолуогун ууратар туһунан сокуоҥҥа илии баттаата. Бу туһунан Кириэмил сайтыгар суруйдулар.
Госдума үһүс ааҕыытыгар НДФЛ нолуога суох дохуоттар испииһэктэрин кэҥэтэр туһунан сокуону ылынна. Бу испииһэккэ оҕо ыйдааҕы төлөбүрдэрэ эмиэ киирдилэр.
Санатар буоллахха, бэрэсидьиэн көҕүлээһининэн, бырабыыталыстыба 2018 сыл тохсунньу 1 күнүттэн бастакы, иккис оҕолоро төрөөбүт (иитэ ылбыт) дьиэ кэргэттэргэ ыйдааҕы төлөбүрү олохтообута. Бастакы оҕоҕо төлөбүр тиийинэн олоруу алын кээмэйигэр тэҥнэһэр. Саха сиригэр бу суума – 16-20 тыһ. солк. буолар. Оттон иккис оҕоҕо бэриллэр босуобуйа Ийэ хапытаалыттан төлөнөр. Ол эрээри дьиэ кэргэн хас биирдии чилиэнигэр тиксэр дохуота тиийинэн олоруу алын кээмэйин балтарааҕа төгүллээбиттээҕэр намыһах буолуохтаах.
13 %-наах нолуок ууратылыннаҕына, дьиэ кэргэттэр илиилэригэр ылар суумалара улаатан биэрэр кэриҥнээх. Бу миэрэлэр оҕо төрөөһүнэ элбииригэр туһуланаллар.
Росстат дааннайынан, 2017 сылга Арассыыйаҕа төрөөһүн таһыма 10,7% түспүтүн бэлиэтээбиттэрэ. Ол эбэтэр дойду үрдүнэн 1,69 мөл. оҕо төрөөбүт, ол 2016 сыллааҕар 203 тыһыынчанан аҕыйах.
Ангелина Васильева, “Саха сирэ” хаһыат, edersaas.ru